Alrededor di 2 mil cupo di trabao den construccion: Gobierno a dicidi di prolonga fast track despues di seis luna

Alrededor di 2 mil cupo di trabao a produci e proyectonan di construccion cu a start aworaki for di gobierno a bin cu e fase 1 di flexibilidad di e shelter in place. E nivel aki a inclui e apertura di e sector aki, entre otro actividad economico.

E cifra aki a wordo duna ayera mainta pa director di departamento di Infrastructura y Planificacion (DIP), Haime Croes kende a referi riba e proyectonan fast track. E funcionario a bisa cu nan ta bayendo bon. Pero tambe nan ta hayando prioridad pa reactiva nos economia.

El a informa cu gobierno a dicidi di prolonga e fast track despues di seis luna. Nan intencion ta pa mas proyecto innovador por drenta pa asina nan por guia nan riba e caminda mas facil pa nan por wordo concretisa.

Aproximadamente 60 proyecto a pasa den e categoria di fast track. DIP por mira cu un 44% di nan, ta proyectonan relaciona cu mantencion. “Hopi di nan ta den pleno ehecucion,” el a bisa. Igualmente un 24% di e proyectonan ta relaciona cu construccion di cas. Tambe nan ta mira un 14% relaciona cu proyecto turistico. Despues cu nos pais a cay den un total recesion debi na e crisis di Coronavirus/Covid-19, e meta ta cu e proyectonan fast track lo yuda reactiva nos economia mas lihe posibel. Croes a bisa cu e balor total di e inversion ta casi 1 miyon florin.

Tin 18 proyecto totalmente nobo riba seis sector cu Aruba ta cuminsa explora. Nan a bira un posibilidad pa trece diversidad den nos actividad economico cu pa basta aña a cay riba e pilar economico di turismo. “Nan ta proyectonan hopi ambicioso y moderno,” el a bisa. E ta haya cu e proyectonan aki mester bira e curason di nos economia pa futuro.

Nan ta proyectonan na balor di 47 miyon. Un 27% ta relata na agricultura y tambe loke ta wordo yama economia nobo relaciona cu cannabis. Nan ta proyectonan cu a cuminsa cana nan caminda hayando financiamento.

Pero DIP ta bezig con nan por yuda den e iniciativa empresarial aki pa nan por cuminsa lihe. Pero ya caba e proyectonan a cana gran parti di nan trayecto pa nan wordo ehecuta. DIP ta spera cu den transcurso di e proximo 6 luna, nan por bin cu un porcentahe halto di e 18 proyecto aki pa nan por cuminsa cu nan caba.

DIP ta poniendo atencion cu otro instancianan manera departamento Economico y Banco Central riba proyectonan cu mester wordo ehecuta entre 3 pa 6 luna. Nan ta fast track e proyectonan aki pa nan wordo ehecuta mas lihe cu ta posibel, kitando burocracia, pero cumpliendo y kedando den margen di ley, segun director di DIP.