E calidad di bida di e pashentnan HIV/Aids a mehora substancialmente na Aruba. Mientras di otro banda, AZV ta cubri e gastonan di tratamento pa e aseguradonan diagnostica cu e virus aki.
Asina Lativa Mercera-Croes di Departamento di Malesa Contagioso y Joost van der Kamp vocero di AZV ta divulga na Bon Dia Aruba.
E calidad di bida di e pashentnan HIV/Aids a cambia positivamente pa nan. Tin pashent cu a wordo diagnostica cu 16 aña cu HIV positivo cu ainda ta wordo yuda pa Departamento di Malesa Contagioso. Nan ta ricibiendo nan remedinan regularmente keto bay. Practicamente awendia HIV/Aids ta manera un malesa cronico cu bo por biba cu ne basta aña. Sinembargo e pashentnan mester uza nan remedi debidamente. Tambe nan mester come bon, pues si e ta hiba un bida saludabel, nan calidad y promedio di bida por ta hopi mas largo. Pero e palabra clave ta: proteccion.
E persona sexualmente activo mester uza proteccion den un relacion sexual cu lo por trece risico p’e. Pero e proteccion aki mester bay mas leu te hasta entre e parehanan cu a wordo diagnostica HIV positivo.
Resistencia
Sra. Mercera-Croes a splica cu si e virus cu un di e pareha tin cu ya caba ta uzando cierto remedi, e ta crea un resistencia cu ne. Si e tin relacion cu su pareha sin proteccion cu tambe ta HIV positivo, e ta bay pasa un tipo di HIV cu tin un resistencia caba na e su partner. Esaki ta trece como consecuencia cu ora e persona aki ta cuminsa haya remedi, e no por haya e remedi aki caba pasobra el a crea un resistencia pa e tipo di virus di HIV ey.
E ora e mester uza un tipo di remedi cu ta un tiki mas caro. Si e remedi inicial tin un prijs mas barata cu ta traha pa un pashent specifico. Si e otro pashent cu HIV a crea resistencia pa e tipo di virus aki pa via cu a tene sex sin proteccion, e ora e mester uza un remedi mas caro. “E ta un carga basta grandi ariba AZV.”
Sr. van der Kamp ta declara cu e tratamento pa HIV/Aids ta wordo cubri pa nos seguro medico general. Actualmente tin alrededor di 160 hende cu ta hayando e tratamento pa HIV/Aids cubri pa AZV.
E ta kere cu eventualmente e cantidad di hende na Aruba cu tin e virus aki ta mas halto debi cu e hendenan no sa ainda cu nan ta infecta cu e virus aki. Of tambe tin hendenan cu no ta sigui un tratamento na Aruba pa keda anonimo; y nan ta prefera di bay otro pais bisiña, ya cu HIV/Aids ainda ta un taboe na Aruba.
Remedi y team internista
Ultimo 28 aña hopi cambio a bin den mundo cientifico cu ta mehora e calidad di bida di e pashentnan HIV/Aids. Sra. Mercera-Croes ta recorda cu hopi admiracion e tempo cu sr. Ruben Odor (d.f.m) kende tabata un persona balente cu a lucha contra stigmatisacion y discriminacion di e pashentnan victima di HIV/Aids, tabata bebe un cocktail di remedi entre 10 pa 14 pildo pa dia cu ta algo hopi pisa pa un persona. Aworaki e tratamento a wordo reduci di un pa dos pildo pa dia cu tin menos efectonan secundario.
E remedinan cu ta wordo duna na e pashent di HIV/Aids na Aruba no ta uno generico of barata. Nan ta remedinan “top of the top” di e miho calidad y cientificamente mas avansa, segun sra. Mercera-Croes.
Di otro banda e guia di e team di dokternan Internista ta uno masha avansa y e maneho di e pashentnan HIV/Aids ta full nobo. “Nos tin un team basta jong di internista pa trata e personanan HIV positivo.”
Sr. Van der Kamp ta elogia e trabou cu e team di internista di Horacio Oduber Hospital ta bin realisando pa trata e pashentnan HIV/Aids na Aruba. Entre nan dr. Kelly kende ta esun cu ta organisa e trato pa e pashentnan aki dunando un bon cuido pa nan.
E ta bisa cu unabes cu un persona ta wordo diagnostica cu HIV, e pashent ta haya su tratamento cubri pa AZV. Esaki ta trece cu ne un expectativa di bida pa e pashent te hasta mas miho incluso cu un hende cu diabetes.
Informacion y mortalidad
Sra. Mercera-Croes ta haya cu a pesar cu tin hopi informacion afo riba e virus aki, ainda tin hendenan cu tin un pensamento anticua creando un ambiente di discriminacion rond di e persona cu tin HIV/Aids.
Tin hendenan cu tin miedo di wordo contagia pasobra su colega ta HIV positivo y nan ta traha hunto of nan ta wordo transporta den e mesun auto. Te hasta ainda den nos comunidad tin hendenan cu ta pensa cu e por wordo contagia pasobra ta uza e mesun glas.
Te hasta pashentnan ta wordo discrimina pa nan mesun famia cu ta laba nan cos di kibra y nan paña apart. Of ora cu e pashent ta uza e baño, nan ta haci limpi tur cos den baño cu clorox.
“Esey ta falta di educacion. E hendenan ta cay den un patronchi cu bo no ta compronde dicon. Si e informacion t’ey pa kico tin tanto miedo asina”, sra. Mercera-Croes ta bisa.
Tur hende sa cu e no ta wordo infecta asina, sino pa via di relacion sexual of via sanger pa sanger y di mama pa yiu. Te hasta di mama pa yiu e transmision di e virus casi no ta posibel mas. Ya ta test tur hende y ora e baby nace, e ta haya su cantidad di remedinan y despues di un aña e ta bira HIV negativo.
Sra. Mercera-Croes ta haya cu e actitud aki tin mas di haber cu e miedo cu cada persona tin pa confronta nan mes cu nan mortalidad y cu un virus cu tur hende ta pensa ta morto so e ta trece. Na Aruba e cifra di mortalidad na aña 1999 tabata 10 caso di persona cu Aids cu a fayece di cual 7 di nan tabatin un edad di 25 pa 44 aña. Na 2014 e cifra a bira 2 caso di morto di cual uno tabatin un edad di 25 pa 44 aña; y e otro tabatin un edad di 60 aña pariba.
Mirando cu e cifranan di pashent infecta cu HIV/Aids a crece y e edad di e pashent infecta a baha, departamento di Malesa Contagioso, ainda e campañanan di conscientisacion y prevencion ta sigui tumando luga cerca nos hobennan.
Nan ta sigui duna charla na scol, caminda nan ta hayando hopi peticion pa duna lectura. Esaki ta e manera cu nan ta acercando na nos poblacion mas jong. Nan ta pensando riba un campaña masal cu por yega na e poblacion entre 14 pa 75 aña cu ta sexualmente activo.
Sra. Mercera-Croes ta haya cu a yega tempo pa e mayornan sinta papia hopi mas cu nan yiunan y pone mas atencion pa nan. E conexion aki ta yuda pa disminui e posibilidad cu nan por tin relacion sexual na edad hooi tempran.
Ademas nan ta hopi mas na cas y e posibilidad cu nan por haya malesa transmiti sexualmente ta menos. No solamente ta HIV sino cu e riesgo pa keda contagia cu malesanan transmiti sexualmente manera gonorea, syfilis, clamidia, herpes, hepatitis B, etc. ta halto. E cifra di casonan relaciona cu e malesanan aki ta halto, producto di e relacion sexual sin proteccion.
