Ayera hues a dicta den e caso cu politico Alonso Tromp a entama contra lider di PDR Andin Bikker. Hues a rechasa e demandanan di sr. Tromp y duna Camara di Comercio e rason pa no inscribAi e directiva nobo pa partido Democracia Real.
Corte a subraya cu e directiva nobo cu sr. Tromp kier a apunta pa e partido no por wordo considera como miembro. Tambe cu e grupo di dies persona cu sr. Tromp a trece hunto, e no por cambia e directiva di e partido. Sr. Tromp tin cu paga aworaki 5.000 florin na gasto di abogadonan pa sr. Bikker y Camara di Comercio.
“Nos ta desapunta. Nos a bin cu echonan. Nos ta un grupo serio, nos no ta mucha chikito akinan. E statuto ta papia cla y hues ta mustra cu statuto no tin e validez ey,” sr. Tromp ta bisa. E ta sigui conta nos cu e ta un persona fuerte den caracter cu ta para pa principio, anto a base di conseho di nan abogado nan lo sigui cu siguiente pasonan.
Caso
Sr. Tromp: “Corda bon, nos no ta hurista. Nos a actua sigur sigur riba conseho di tur cinco hurista. Segun mi a compronde for di un abogado, e nunca a yega di wak un veredicto completamente eenzijdig manera esun aki.” E ta enfatisa cu statuto ta papia di asociacion, y si den nos cultura bo pega un sticker di otro partido, esaki ya caba ta indica cu bo ta cu e partido aki.
