(NLTimes) – Instituto di lenguahe Taalcentrum a lansa un “kans klas” na Almere enfoca riba yuda e studiantenan internacional di 11 pa 12 aña mehora nan idioma Hulandes pa asina nan por atende scol secundario regular.
E prome tipo di klas aki na Echnaton School Group ta consisti di mas o menos 10 studiante di henter mundo, Omroep Flevoland a reporta. Jagar ta di Kurdistan, Narek ta di Armenia. Algun recientemente a muda bay Hulanda mientras cu otronan tin un aña of te hasta a nace na e pais. Mayoria di e studiantenan ta maneha Hulandes pero ta emociona pa por mehora den e idioma.
“Nan a ricibi un aña di educacion den e lenguahe intenso,” maestro Debbie de Haas a splica na e noticiero. “Tambe nan ta haya matematica y otro materianan cu nan lo haya na scol primario. Sinembargo e enfasis ta riba adkiri habilidadnan den e lenguahe Hulandes.”
“Mi kier tuma e klas aki pa mi por yega un nivel mas halto,” Jagar a bisa e noticiero. “Eora mi lo por atende scol regular.” Otro studiante, Vanessa, a bisa cu e por compronde e lenguahe ora cu otronan papia esaki cune. “Mi problema ta ora di haya e palabranan pa papia mi mes.”
Taalcentrum su director Theo Klein Koerkamp ta emociona pa e studiantenan aki. “Pa medio di duna nan e atencion cu nan ta merece y duna nan e confiansa den nan mes, nan por mehora.”
