Enfoca riba importancia pa siña otro idiomanan, Alliance Francaise Aruba a haci un donacion di bukinan pa Biblioteca Nacional Aruba cu a wordo denomina ‘Coleccion Skina Frances’.

Erick Vinck presidente di e organisacion aki den un entrevista cu e medio Primer Impacto a expresa cu nan a haci un entrega simbolico di algun bukinan pa motibo cu for di algun tempo caba nan ta mira cu e cantidad di bukinan den idioma Frances ta poco y como un muestra di gradicimento na e cooperacion cultural y linguistico cu Biblioteca Nacional a duna na nan durante dos aña, e entrega di bukinan aki a wordo considera como un bon gesto.

Nan a duna como donacion na Biblioteca Nacional Aruba un cantidad di 40 buki di Frances di varios nivel, entre otro di muchanan, hoben y adulto manera Vinck a sigura.

Esaki tin como obhetivo cu e comunidad Arubiano cu tin interes den idioma Frances por bay te Biblioteca Nacional y haci uso di e bukinan, e ta considera cu e idioma aki pa via di e cambionan geografico y etnico hopi paisnan cu tin idioma Frances a emigra na otro paisnan caminda el a bira un idioma mas popular igualmente cu Ingles y Spaño.

Miembronan di Alliance Francaise Aruba automaticamente tambe ta miembro di Biblioteca Nacional Aruba, segun loke Vinck a expresa.

Tambe el a informa cu for di dos aña caba nan a bin ofreciendo cursonan di Frances basico ya cu den sistema Europeo den cuadro di referencia pa idioma ta considera e nivelnan A, B y C, na Aruba nan ta bin implementando e nivel A1 y A2 cu ta conforma e nivel A, nan ta organisando e nivel B cu ta wordo considera como cursonan basico pero no ta nifica cu e persona no por papia Frances, “cu idioma A2 e persona ta papia Frances y realmente nos enfoke ta basa den e practica y papia Frances”, Vinck a expresa.

Igualmente el a sigura cu tin personanan cu ya caba a siña e curso cu e organisacion aki pero e enfoke tabata diferente, e tabata algo mas internacional y e ora ey tabata basa di loke por wordo haci internacionalmente, pero na Aruba e cultura ta diferente loke ta haci cu 80% of mas di e participantenan ta haci pa hobbie of nan ta interesa di mehora e nivel di Frances cu nan tin.

Dianan pasa a haci entrega di varios diploma unda cu door di esey e hendenan por mira con Alliance Francaise Aruba ta bin desaroyando cu e cursonan aki cu tin un nivel reconoci na unda cu e prijsnan ta varia entre 200 florin pa 350 florin pa no miembronan, dependiendo di loke ta bay wordo trata, e gramatica y si ta bay wordo siña e idioma for di e base, pa e miembronan di Alliance Francaise Aruba tin un prijs di 300 florin. E cursonan di 200 florin ta pa papia solamente y nan ta basa den e parti di gramatica cu e personanan a haya caba ya cu nivel A ta componi den varios fase.

Pa finalisa, el a informa cu otro siman ta cuminsa e cursonan pa papia cu lo dura tres luna na Biblioteca Nacional na San Nicolas y otro cursonan ta cuminsa na october y na februari di aña 2023.

Pa personanan cu tin interes di siña idioma Frances, Alliance Francaise Aruba tin e number di telefon 567.8200

Pa finalisa, ta importante pa destaca cu Alliance Francaise ta un organisacion internacional cu tin como obhetivo promove idioma Frances y e cultura di Francia na henter mundo, el a wordo funda na 1883 pa un grupo cu tabatin como miembro e cientifico Louis Pasteur.

Su prome nomber tabata lliance française pour la propagation de la langue nationale dans les colonies et à l’étranger (Aliansa France pa propagacion di lenga nacional na colonianan y stranhero) y awor ta conoci como Alliance Francaise cu tin e obhetivo principal di siña Frances como e di dos lenga rond di mundo.

Su sede principal ta ubica na Paris, na 2014 Alliance Francaise tabatin 850 centro na 137 pais di tur continente.