Nos ta acercando e temporada unda cu varios di nos hobennan lo sali for di e pais pa sigui nan estudio den exterior. Algun ta bayendo paisnan conoci manera Hulanda, otronan Merca, y hasta Canada. A pesar cu nan ta bayendo varios diferente luga, algo ta keda en comun: Tur lo ta studiante internacional.

Como un studiante, tin hopi lucha cu un hoben y/of persona ta enfrenta, y tur esaki por ta aun mas dificil pa un studiante internacional, ken mester siña ambos na scol y den bida, completamente nan so y leu di cas.

Nos sa tende hopi di hobennan ora cu nan sali for di nan pais pa sigui un estudio den exterior, pero nos no ta tende hopi di con hopi esfuerso nan ta haci den exterior, y con nan bida en realidad por ta. Hopi biaha nos ta lubida cu e hobennan aki no solamente ta bay exterior pa studia, sino tambe pa desaroya nan mes y nan bida. Ademas di percura pa tin un bon prestacion na scol y genera bon resultado, nan tin cu crece, desaroya, y hopi biaha siña conoce nan mes den un mundo completamente diferente na esun cu nan conoce.

Esaki ta e caso pa hopi studiantenan manera Alina Bobrova, ken tin 19 aña di edad y a sali for di su pais natal Latvia pa sigui su estudio na Hulanda. Alina a expresa cu e parti mas dificil pa su persona tabata sinti su mes na cas “na un luga nobo, unda cu mi no tabata conoce ningun hende.” E ta sigui conta cu “na comienso e tabata basta dificil pa nabega e ambiente stranhero. Sinembargo despues di un tempo, mi a conoce varios persona cu a yuda mi cana e caminda.”

Na momento cu e hoben yega su destino pa studia, prome cu logra experiencia scol, e prome cos cu tin cu lidia cune ta e ambiente nobo. E prome desafio hopi biaha ta custuma cu e pais nobo y sobrepasa e shock cultural inicial. Mester tambe reconoce cu esaki no ta e caso pa tur hoben, sinembargo, mayoria biaha, mas leu di cas e hoben bay, mas grandi e shock cultural por ta. E bunita banda di esaki ta cu e ta yuda nos muchanan desaroya nan independencia, y siña nan sali for di nan zona di comfort. Esaki no ta nifica cu nos por laga nan pa nan mes, asumiendo cu pa motibo cu nan mester independisa, nan mester siña con pa sobrepasa e momentonan aki nan so.

“Personalmente, mi ta kere cu un di e conceptonan eroneo mas grandi cu tin ta cu studiantenan ta adultonan completamente desaroya, siendo cu e realidad ta cu mayoria di nos no sa en realidad kico ta pasando rond di nos, y ta purbando di por siña con pa biba nos so, ta un persona responsabel y independisa nos mes,” Alina a comenta, agregando cu esaki ta trece hopi stress y e lo ta algo “hopi bunita si adultonan dispone nan mes pa yuda nos mas y sostene nos, primeramente pa medio di compronde cu nos ta haciendo nos best, y e no ta facil pa nos por balansa studia, biba nos so pa prome biaha y traha tambe.”

Mayoria studiante cu bay studia den exterior, eventualmente mester traha tambe. E por ta algo sumamente dificil pa por balansa scol, custuma na un bida nobo, siña conoce bo mes, desaroya bo mes, crea amistadnan nobo y traha. Tur esaki ta agrega stress y presion riba nos hobennan pa motibo cu for di scol caba nan ta haya tareanan cu hopi biaha ta sumamente grande, manera por ehempel un pelicula, pa Alina e “preocupacion mas grandi di e tarea aki ta e parti di finanzas. Nos mester a busca tur e localidadnan, actornan y fondo nos so. Esaki ta algo hopi dificil.” E hecho cu nos hobennan hopi biaha ta bao asina hopi stress y mester enfrenta tanto desafio na mesun momento, ta haci cu ta di suma importancia pa nos tur siña y busca manera di yuda nos hobennan cu ta den exterior.

Nos como mayornan y/of adultonan den e bida di e hobennan aki, cu pronto lo ta den e mesun trayectoria cu hopi di e hobennan cu a sali bay prome cu nan, mester mantene un bon comunicacion y conscientisacion di ambos banda, tanto pa e studiante como pa e mayor of adulto cu lo compaña nan riba e caminda. Nos tin cu semper tene na cuenta cu nos hobennan lo sigui tin mester di nos aunke nan ta pasando door di e proceso di independisa nan mes. Nan tin mester di sosten y apoyo di mesun manera, y hopi biaha aun mas, cu ora nan tabata banda di nos.

Y nos hobennan, manera e conseho di Alina, ken ta un hoben canando e caminda cu pronto boso lo cana, ta bisa “no tene miedo di pidi pa ayudo. Esaki no ta e momento unda cu bo por haci tur cos bo mes ainda, y mayoria persona ta dispuesto pa ricibi bo cu man habri, y brinda e sosten y apoyo cu bo tin mester, pero abo tin cu pidi p’e y busk’e.”