Sobrepeso infantil ta un di e problemanan di salud publico mas grave di siglo 21. Esaki ta un problema cu ta afectando hopi pais cu hopi y cu poco pilar economico. Ta calcula cu na 2016 caba, mas di 41 miyon di mucha menor di 5 aña na henter mundo tabata sufri di sobrepeso of tabata obeso.

Ayera mainta, Fundacion E Solo a cuminsa su actividadnan oficialmente pa duna di conoce loke nan ta haci na fabor di e muchanan di Aruba.

E fundacion tin como obhetivo yuda e muchanan cu sobrepeso na Aruba pa nan por biba un bida mas saludabel, trahando hunto cu mayornan. E fundacion tambe ta yuda e muchanan y ta apoya iniciativanan destina pa detene, reduci of preveni obesidad.

Alice van Romondt, presidente, a splica cu a lanta e fundacion pa via di Hellen Ciro, ken a baha peso for di 120 kilo pa menos cu 60 kilo. Door cu e tin 25 aña biniendo na Aruba, el a pensa cu e kier haci algo pa e muchanan cu tin sobrepeso of esunnan cu ta sufri di obesidad, pa nan por sinti bon manera e ta sinti ora el a baha peso y biba saludabel.

Ciro a haci un sondeo na Hulanda y el a haya un programa cu ta yama ‘Cool 2B Fit’, un programa enfoca riba muchanan y mayornan. E dietista, fisioterapeuta y cientifico conductual ta traha hunto pa yuda e famianan pa come mas saludabel y haci mas ehercicio.

Pa e motibo aki, Van Romondt a expresa cu Ciro a bisa pa nan lanta un fundacion, uza e programa aki y forma ekiponan. E prome paso cu nan a haci ta na salubridad publico pa hobennan y eynan a haya e expertonan cu nan mester pa e programa aki bira exitoso.

Nan ta conta cu diferente personanan specialisa, tambe hunto cu e coordinador di e fundacion y presidente di comision Scol Saludabel, Miriam Baez nan ta coordina e ehecucion di e programa den scolnan selecciona.

E di dos fase, Van Romondt a bisa ta na caminda pa cuminsa den bario di Noord. Nan ta bay acerca Centro di Bario pa hunto cu Santa Rosa y nan partners di Aruba crea hardin di berdura y fruta na e Centro di Bario, pa e muchanan por cuida.

Di tres fase, Van Romondt a señala cu ta Urvin Croes, reconocido chef, kende lo traha un buki pa come y cushina saludabel dirigi riba mucha y tambe pa nan mayornan.

Tambe el a comenta cu nan no ta selecta muchanan di scol basico, sino di e scol cu ta traha conhuntamente cu salubridad publico pa hobennan. Nan ta permanece regularmente den scolnan y nan tin conocemento di muchanan cu e problema aki.

Cu e programa, no mester bisa e muchanan cu tur siman mester baha di peso y pisa. Esaki ta inclui diferente experticio pa por bay den un proceso natural, cu e mucha ta haya un estilo di bida natural pa via di un coach y otro expertonan, como tambe deporte.

Na e momentonan aki, e fundacion ta conta cu ocho mucha, pa motibo cu kier implementa e programa paso pa paso, pero di un manera sigur.

Corina Rolfast, dokter di cas y consehero di Fundacion E Solo a, splica cu na Aruba tin hopi muchanan cu ta sufri di sobrepeso of obesidad. E problema aki ta presente caba den 40% di muchanan di vijfde klas.

Entre 2001 y 2016, segun un encuesta di Directie Volksgezondheid Aruba (DVG) a duna di conoce, e porcentahe di poblacion di 25 pa 64 aña cu un indice di masa corporal normal a disminui di 25% pa 17.5%, mientras cu esunnan cu sobrepeso a aumenta di 74.6% pa 81%.

Ademas, alrededor di 75% di e poblacion di 20 aña of mas tabatin presion halto y un 45,3% tabatin nivel di colesterol eleva.

Sobrepeso of obesidad ta un factor di riesgo grave pa desaroya enfermedad cardiovascular y diabetes tipo 2, un importante contribuyente pa un morto prematuro. Na 2010, tambe a keda conoci cu 42,7% di alumnonan di vijfde klas tabata sufri di sobrepeso of obesidad.

Pa finalisa, nan a duna e mensahe pa muchanan por sigui cu e programa, cu ‘pa fin di dia nos tur kier biba y come saludabel’, nan a sigura.

Organisacion Mundial di Salud ta recomenda aplica medida na henter mundo pa reduci e consumo di bebidanan cu sucu y asina tambe reduci e prevalencia di e obesidad, diabetes tipo 2 y caries dental.