(AP)—Mientras e posibilidad ta crece cu Joe Biden y Donald Trump lo enfrenta otro atrobe durante eleccionnan presidencial na Merca, aliadonan di Merca ta preparando pa un termino dificil. Hopi ta preocupa cu un segundo termino pa Trump lo ta un teremoto, pero mirando e temblornan cu tin caba, tin preocupacion cu Merca lo bira menos confiabel, no importa ken gana.
Cu un division den Congreso, e proximo presidente Mericano por ta bombardia cu diferente retonan na cas—y sin menciona asuntonan rond mundo, di Ucrania pa e Medio Oeste.
E veredicto di presidente Frances, Emmanuel Macron, tabata directo: Merca su “prome prioridad ta su mes.” E prome administracion di Trump a test e relacionnan entre Merca y su aliadonan, particularmente den Europa. Trump burla di lidernan di algun nacionnan amistoso, incluyendo Angela Merkel di Alemania y Theresa May di Britania, mientras cu el a gaba autoritarionan manera presidente Turco Recep Tayyip Erdogan y lider Ruso Vladimir Putin. Tambe el a yama lider di China Xi Jinping “briyante” y Viktor Orbán di Hungria “un bon lider.”
Den discursonan di campaña, Trump ta keda dudoso di organisacionnan manera NATO, criticando e biyones di dollar cu Merca ta aloca den aliansa militar di ken su apoyo ta crucial pa Ucrania den su lucha contra e invasion Ruso. El a bisa den un evento di campaña diasabra cu, como presidente, el a adverti aliadonan di NATO cu e lo encurasha Rusia “pa haci kico e kier” na paisnan cu no ta paga nan parti den e aliansa. Trump tambe a skirbi riba su red socialnan cu den futuro Merca mester caba cu tur donacion di ayudo den exterior y reemplasa esaki cu prestamonan.
Secretaria-General di NATO, Jen Stoltenberg, a adverti cu Trump a riesga e seguridad di tropanan Mericano y nan aliadonan. “Cualkier sugerencia cu aliadonan no lo defende otro ta socava tur nos seguridad, incluyendo esun di Merca, y ta pone soldaatnan Mericano y Europeo den mas riesgo,” el a bisa den un declaracion diadomingo.
Al contrario, Biden a haci apoyo pa Ucrania un prioridad importante y imperativo moral. Pero e declaracion di Biden despues di su eleccion na 2020 cu “Merca t’ey back” riba e escenario global no a ser sosteni completamente. Republicanonan congresional a retrasa mas ayudo militar pa Ucrania, mientras cu e influencia di Merca no por a contene conflicto den e Medio Oeste.
Thomas Gift, director di Centre on U.S. Politics na University College London, a bisa cu ken cu gana e careda presidencial, e direccion lo keda mescos—pa un planeta multipolar den cual Merca no ta “e super poder di mundo” mas.
