Den comienso di aña na luna di februari Bon Dia Aruba a trece dilanti den un publicacion cu tur comerciante mester acepta pa swipe suma bao di dies florin. Aparentemente ainda algun comerciante no ta cumpliendo cu esaki pa motibo cu hopi ta uzando un sistema di ATM poco anticua, segun nos ta compronde for di un comerciante.

Vice presidente di Aruba Banker’s Association (ABA) Pierre Rafini a subraya algun tempo atras cu tur comerciante mester acepta swipe bao dies florin tambe. Tur banco na Aruba ta hiba e mesun maneho. “Nan (comerciantenan) ta firma contract cu banco sabiendo cu nan no mag di pone un suma minimo ora di swipe,” sr. Rafini a declara na Bon Dia Aruba.
Un ciudadano a expresa na Bon Dia cu el a haya algun problema recientemente cu un comerciante cu no kier a acepta pa swipe un suma bao di dies florin. Aparentemente
algun comerciante (supermercadonan y botica entre otro) ainda no a cambia pa un sistema nobo y moderno di ATM cu ta uza internet. Nos a pasa Cheng’s Supermarket
caminda gerencia a splica nos cu ora bo uza sistema di ATM nobo di internet bo ta paga un suma caminda cu bo por swipe cuanto cu bo kier sin limitacion.

Sistema bieu

Hopi negoshi ainda ta pega cu sistema di uza waya di telefon. Kiermen pa nan cada transaccion Setar ta cobra 25 cent mescos ta un yamada e ta haci. “Por ehempel si bo
cumpra algun cos chikito, cu ta cuater of cinco florin, por ta e ganashi lo ta 15, 20 of 30
cent. Anto mi ta perde 25 cen di a dialing di e carchi, e ora mi no ta gana nada,” gerencia
di Cheng ta splica Bon Dia. Antes tabata asina cu tabata uza sistema di waya di telefon
cu ta tarda pa conecta, y tarifanan di esaki tabata demasiado caro. Anto p’esey hopi hende ainda a keda cu e custumber ey anto a lubida cu ora cambia di sistema, no
tin limitacion pa swipe segun comerciante di Cheng’s. Banco tambe ta gana su comision naturalmente den e sistema aki. Cada banco tin comision riba un ATM pa luna; si mester swipe por ehempel 200.000 florin, Banco ta haya un porcentahe di esaki. Cada mashin di ATM cu bo tin den bo negoshi ta costa bo 100 florin pa luna.

‘Si ta 1 florin mes, e mester pasa’

Armin Solognier , Senior Business Developer na Caribbean Mercantile Bank N.V. ta bisa nos cu e acuerdo cu e negoshi tin cu banco pa e por tin un ATM ta bisa claramente cu bo mester por swipe tur suma. “Nan ta firma un contract pa esaki y tur banco tin mesun areglo cu e comerciantenan cu tin nan machine. Si ta un florin mes, e mester pasa riba un florin,” sr. Solognier ta bisa. E ta recorda nos cu e tema aki a bin dilanti den comunicadonan di ABA mas cu un biaha caba. CMB en todo caso ta pidi nan clientenan si nan haya nan mes den un situacion unda cu un comerciante ta nenga di pasa e carchi bou

un cantidad di placa, pa laga nan sa ken e comerciante ta. Asina nan lo comunica cu e
comerciante y bis’e cu e no por nenga un cliente. “Mi no por papia pa otro pero esey ta
e paso cu nos ta tuma.”