Algun localidad riba beach a wordo cera

Prome control di Task Force Beach Policy a tuma luga

Gino Winklaar, lider di e Task Force Beach Policy a informa cu e accionnan di e Task Force Beach Policy a cuminsa. Esaki segun un comunicado cu nos a ricibi. Den siman diferente ministernan y departamentonan concerni a reuni pa trata e maneho di Beach Policy y pa percura pa enforsa e maneho di ‘3 strikes you’re out’.

Minister Otmar Oduber como e minister encarga cu DIP y tur locual cu ta encera permiso di operadornan riba nos beachnan ta splica cu e ‘controlnan aki lo wordo tuma luga den un forma structura pa asina garantisa cu nos pilar economico ta wordo proteha y nos beachnan respeta’.

E controlnana inicia for di trempan despues cu e task force a reuni 9or di mainta. E control a inicia na Beach Druif pa noord di Tamarijn y sigui bay pabou. For di e 42 compania di watersport cu nan a controla, 40 di nan a haya nan prome advertencia y 2 di nan a wordo cera (doñonan no tabata presente). 3 di nan mester a wordo cera inmediatamente pasobra nan no tabatin permiso pa opera. Tur esunnan cu a haya strike mester pasa na DIP durante di e siman aki pa controla nan papelnan. Tambe DIP lo bay procesa esaki cu nan departamento huridico.

Departamentonan trahando hunto bou e task force
Segun sr. Winklaar, e task force a haya un bon comienso, e cooperacion di e diferente instancianan bou di un pechi ta dunando su frutonan pa locual cu ta encera e diferente tareanan di e departamentonan cu ta cruza den otro, segun e relato.

E beneficio di tin tur e departamentonan trahando multilateralmente riba e asunto aki ta cu por traha na un forma mas eficiente. E advertencianan cu a wordo duna tabata basa riba diferente regulacion cu no a wordo cumpli cu ne, esaki ta encera cu no a cumpli cu condicionnan stipula den e permiso. Sr. Winklaar ta remarca cu tin hopi falta di comprondemento pa loke ta trata kico mag y no mag, di parti di e operadornan cu tin basta tempo ta opera cu mal custumber.

Sinembargo ta keda para riba e punto cu e strike ta conta, y e maneho di 3 strikes ta keda vigente. Den cada advertencia cu a duna e operador tin tambe un fecha stipula como fecha final pa asina e cumpli of regla e fayo.

Intencion di e Task Force Beach Policy ta pa percura pa tin control riba locual cu ta tuma luga riba nos beachnan y trece e sentimento di siguridad bek den e area. E accionnan aki lo wordo tuma luga pa garantisa cumplimento di e Beach Policy. Den e proximo simannan nos dilanti pueblo por spera cu lo tin mas control ta tuma luga den diferente area riba nos beachnan, e relato ta conclui.