Algun dokternan haciendo trabao ilegal ta actualmente bao investigacion

“Tin diferente forma di traha. Tin esun cu ta traha ilegal como tambe esun cu ta ‘moonlight’ of ‘bijbaantje’. Bo tin dokternan cu tin contract cu AZV anto den nan tempo liber nan ta haci otro cosnan,” Minister di Salud ta bisa Bon Dia Aruba.

 

Den un publicacion anterior, Bon Dia Aruba a subraya e tema di dokternan cu ta haci trabao ilegal unda cu Ministerio di Salud Publico a remarca cu den menos di un aña gobierno ta spera di por tin e forsa pa investiga esaki mas profundo.  Ministerio di Salud Publico ta admiti na Bon Dia Aruba cu actualmente tin algun casonan andando unda dokternan ta bao di investigacion, pero segun Minister Alex Schwengle: “Mi no por divulga nada ni ken, ni cuanto anto con e ta para aworaki.” Minister Schwengle ta bisa Bon Dia Aruba cu e ta na moda aworaki pa varios dokter banda di nan trabao regular haci otro tipo di trabaonan, dependiendo con esey ta palabra cu AZV,  cual Minister ta bisa Bon Dia Aruba cu e ta informacion cu e keda debe nos pasobra e tin cu bay dialoga esaki awo cu AZV.  Si como un dokter, bo contract cu AZV ta den siman, anto bo tin un fin di siman liber unda cu riba diasabra bo mes por dicidi por ehempel si bo ta educa den cosmetica pa haci un otro trabao, esaki en principio mag. “Placa priva e ta pues e no ta wordo ‘vergoed’ pa AZV.  Mi ta supone cu esey mester por ta regula pa e trabao priva no interveni cu e trabao di AZV,” Minister Schwengle ta bisa.

 

Ora un persona  ta wordo registra na Directie Volksgezondheid como un dokter na Aruba, e tin permiso pa traha priva sea e tin contract cu AZV of no segun Ministerio di Salubridad. Si no tin e registracion aki na Directie Volksgezonodheid anto e dokter ta ehecuta trabaonan priva manera dokter, e ta trahando ilegal anto segun Minister Schwengle, nan sa di algun caso di algun dokter cu te ainda e ta describi manera redo.  “Nos ta tende pero nos no tin prueba. Bo mester tog prueba of pues un testimonio di un hende of pashent cu a bay cerca e persona ki. Si nos haya algo substancial nos por haci un miho investigacion,” Minister Schwengle ta bisa. Si un persona ta trahando ilegalmente como un dokter, nan no por yega wordo controla a base di ningun prueba pa por cuminsa un caso. Esaki tampoco no ta trabao di Departamento di Inspeccion, kende por haci un evaluacion di e situacion pa ultimamente pasa e caso pa Ministerio Publico mirando cu e acto ta castigabel. Bon Dia Aruba no a haya un reaccion di Ministerio Publico ainda riba esaki.

 

“Nos ta kere si cu na momento cu e Inspectie ta mas grandi y cu mas experiencia, cual nos ta bay ‘build up’ den un pa tres aña, pasobra e ta un departamento nobo e ta bay ta pues e mester wordo traha bon.” Minister Schwengle ta enfatisa cu e accion aki cu nan lo inicia den Januari lo cuminsa trece cambio como tambe un meldpunt di keho riba esaki cu nan ta bay introduci. Esaki ta pa yuda e casonan cana mas miho pa cera protocol entre Departamento di Inspeccion cu Ministerio Publico of pa bay directo Ministerio Publico. “Pueblo mester ta consciente anto esey ta locual ta mas importante. Porta bo ta bay cerca un dokter asina pasobra bo kier un segundo opinion, bo a dun’e placa, fuera di cu ta bo placa e ta, bo ta coriendo un riesgo,” Minister Schwengle ta comenta. Gobierno ta bin cu leynan y beleid pa stipula un minimo di calidad pa garantisa bo unda e situacion ta bira peligroso. Ora cu bo mes ta bay cerca un dokter ilegal, bo ta core riesgo pasobra bo no tin idea ken e dokter ta of sa su capacidad. Nan por wel di ta bon hende, aunke cu esey ta parti di e trabao di un dokter, pero  esaki so no ta nifica cu e tin e capacidad of ta un bon dokter den practica segun Minister Schwengle. Riba dje, na momento cu e persona haci un daño of mal trabao bo no por bay busca e placa tampoco, ta pueblo mester paga esaki.  Minister  Schwengle ta conclui cu: “Ta keda tambe na nos mes pa ta cauteloso na unda nos ta bay, pasobra ultimamente gobierno por haci cuanto cu e kier pero no tin sentido si pueblo mes ta bay di acuerdo cu e cosnan ilegal aki.”