(AP) – Si bo ta pleitando contra un personahe den un videogame cu tin un accento of bo ta pidiendo un personahe crea un spada pa bo, posiblemente bo por ta tendiendo e bos di un actor, manera por ehempel Andy Magee.
Pero, esaki no ta exactamente e actor su bos. E ta un clone sintetico genera pa inteligencia artificial. Mientras mundo di videogame ta keda expande mas, algun studio ta experimentando cu hermentnan di AI pa duna un bos na un cantidad potencialmente ilimita di caracternan y combersacionnan. Tambe esaki ta spaar tempo y placa riba e grabacionnan cu desaroyadornan di wega ta usa pa test escenanan y guionnan.
E respuesta for di actornan profesional ta mescla. Algun tin miedo cu e bosnan di AI por reemplasa tur di nan, cu excepcion di e actornan mas famoso si e studionan grandi haci nan kier. Otronan manera Magee, ta dispuesto na duna esaki un chens si nan ser compensa hustamente y si nan bos no ser mal usa. “Mi no a anticipa cu bosnan di AI lo ta mi ingreso na e industria, sinembargo mi a ser ofreci un pago pa trabao cu mi bos y mi ta gradici pa cualkier experiencia cu mi por a haya na e momentonan ey,” Magee a bisa.
Awo e ta specialisa den duna un bos na un rango amplio y diverso di caracternan for di British Isles, cual a bira loke e ta considera un show pa fiestanan cu a converti den un carera exitoso.
Clonnan di bos di AI no tin e miho reputacion, parcialmente pa motibo cu nan ta ser mal usa pa crea deepfake convincente di hende real, for di President Mericano Joe Biden te na e difunto Anthony Bourdain, bisando cosnan cu nunca nan a bisa. Algun intento den comienso di desaroyadornan independiente pa agrega esaki na videogame tambe a ser ricibi cu tiki elogio, tanto pa gamernan como actornan, kendenan no tur a consenti pa nan bos ser usa di e manera aki.
Mayoria studio te ainda no ta haci uso di bosnan AI na un manera obvio y te ainda negociacionnan ta andando riba con pa usa nan cu e sindicato di actornan di Hollywood, cual tambe ta representa e personanan cu ta traha den videogame. Preocupacionnan tocante con e estudionan di pelicula lo usa AI a yuda motiva manifestacionnan pero ora ta trata du studionan di wega, e sindicato ta demostrando señal cu un trato ta posibel.
SAG-AFTRA ya caba a haci un trato cu un compania di bos di AI, Replica Studios, anuncia luna pasa e show CES na Las Vegas. E acuerdo, cual president di SAG-AFTRA Fran Drescher a describi como “un ehempel di AI haci corectamente” ta permiti studionan grandi traha cu actornan parti di e sindicato pa crea y licencia un replica digital di nan bos. E terminonan tambe ta permiti nan tuma e opcion di no duna permiso pa nan bos ser usa perpetuamente.
