Ayera atardi Contraloria General Aruba a ofrece un conferencia di prensa pa duna di conoce un rapport nobo riba Publiek Private Partnership (PPP) tocante proyecto di Green Corridor y Watty Vos Boulevard. Den e conferencia tambe tabata presente Dr. Cor van Montfort, un experto den area di Publiek Private Samenwerking (PPS) di Vrije Universiteit Amsterdam y Universiteit Tilburg.

Frederick Nuboer, Presidente interino, a expresa cu e motibo di e rapport aki ta pa un investigacion cu a haci den pasado, cu ta yama ‘Bo Aruba’ y den esaki a inventarisa 242 proyecto cu Gobierno anterior a ehecuta. Esey tabata un motibo, ora cu nan a mira tanto proyecto, pa bay mas internamente riba e parti di Green Corridor y Watty Vos Boulevard.

Rick Samuels, miembro di Contraloria General Aruba, a declara cu nan a haci dos investigacion riba dos proyecto di infrastructura cu ta basa riba un colaboracion entre sectornan publico y priva, conoci como PPP of PPS.

Esaki ta trata di e proyectonan en cuestion, cual a encera contract entre Aruba di un banda y Caribbean Infrastructure Company Grupo Odinsa y na otro banda pa Green Corridor, Mota Engil pa loke trata Watty Vos Boulevard.

Samuels a trece dilanti cu loke a revisa ta tres aspecto: Aspectonan di maneho di e contract, si tin bista riba e riesgonan financiero; y suministro di informacion entre partidonan envolvi na bienestar di Aruba, Parlamento, ministernan y departamentonan di Gobierno.

El a declara cu e investigacion ta importante pa motibo cu den e siguiente añanan lo mester paga sumanan grandi cu ta bin for di comunidad pa paga e proyecto aki. E investigacion lo duna tanto Parlamento como ciudadano un bista un tiki profundo riba e naturalesa di e tipo di contractnan aki, cu ta PPP y den e cuadro aki, a elabora entre otro riba e responsabilidad di cada un di e partidonan.

Ultimamente, e meta di henter accion aki ta pa conhuntamente por yega na mas conocemento riba e materia na bienestar di e pais riba largo plaso. Cu e informacion aki por contribui na un establecimento di base solido pa maneha e contractnan aki y tene pueblo informa.

Cu e rapport, ARA a conclui cu e aspectonan investiga den e maneho di e contractnan di e proyecto ta na ordo, pa motibo cu den practica ta cumpli cu e aspectonan di e contract cu a investiga.

Sinembargo, a base di e resultado di e rapport, a menciona cu e riesgonan financiero riba e proyectonan aki no ta suficientemente cubri, pa motibo cu no tin bista completo riba e riesgonan y cobertura di e gastonan envolvi.

Aruba a introduci temporalmente un belasting adicional pa cubri e proyectonan di PPP, e entradanan aki como impuesto no tin un destino specifico.

Door cu e financiamento di e proyectonan aki ta ‘Off Balance’, e no ta afecta e debe di e pais na comienso di proyecto, aunke si lo mester carga e gastonan pa disponibilidad di e camindanan aki, pa medio di presupuesto di Aruba, pa e siguiente 18 pa 20 aña.

Den opinion di ARA, e suministro di informacion na Parlamento y entre departamentonan di Gobierno mester mehora, door di reporta na un forma integral y duna opinion structural na Parlamento. Den a cuadro aki nan a sugeri cu ta consehabel pa laga DOW y Directie Financien traha hunto riba esaki.

Den e reporte, ARA ta recomenda pa minister di Infrastructura y tambe Minister di Finanzas traha rapportnan, cu mester contene tambe medidanan pa limita y mitiga riesgo y asina duna un bista pa futuro. Ta hopi importante pa e departamentonan traha hunto.

Asina tambe, nan a recomenda pa inverti den desaroyo y conservacion di conocemento na DOW, pensa riba un maneho di personal proactivo, educacion adicional y pa transferencia di conocemento pa locual ta trata e maneho di contract di proyectonan PPP.

Den caso di futuro proyecto PPP, percura pa Parlamento haya suficiente informacion riba implicacion di presupuesto y finanzas pa un periodo mas largo cu un aña. Tambe mester inclui con e proyecto ta influencia e situacion financiero riba termino largo y con ta garantisa e financiamento.

ARA ta boga pa hancra den ley cu mester informa Parlamento tocante e obligacionnan cu ta mara e pais pa mas cu un aña, como tambe di e consecuencia presupuestario. Esaki ta nifica cu mester adapta of complementa e Ley di Compatibilidad riba e punto aki.

Di mesun manera, nan a duna di conoce cu minister encarga cu finanzas no a reacciona riba e mensahe di e rapport, pero ARA a pone enfasis cu mester realisa un rapport integral cu ta inclui aspectonan financiero y di presupuesto, cu informacion di entrada pa cubri gastonan structural di PPP. Minister encarga cu Infrastructura a duna di conoce cu a repasa e recomendacionnan cu atencion y lo discuti entre minister di Finanzas y DOW.

Pa finalisa, Frederick Nuboer a informa cu, den dos siman, lo saca un otro rapport mas tocante Overwerk y prome cu fin di aña lo publica otro tocante Cuenta Anual di Pais Aruba 2018.