ORANJESTAD – Segun informacion di nos colaborador na Noticia Cla, e docente cu recientemente tabata centro di atencion pa a tuma su retiro den un forma abrupto algun siman pasa na Colegio Arubano, a logra gana e galardon “Appel di Enseñansa”.
E galardon a keda entrega pa minister di enseñansa Michelle Hooyboer Winklaar. E ta un honor na esunnan cu ta desplega excelencia den nan trabao diario den enseñansa, un pin di un appel, e simbolo di educacion y esaki lo wordo entrega na tur docente pa nan por carga cu orguyo.
Tabata aña pasa cu Hooyboer-Winklaar a duna di conoce cu e aña aki lo amplia e celebracion di Dia di Maestro y lo trece diferente actividadnan durante e luna di october cu internacionalmente ta e luna di Maestro. El a splica cu a declara october como Luna di Enseñansa y ta poniendo enfasis y enfoke grandi riba esunnan cu ta brinda enseñansa durante di e luna aki.
Mirando cu ta falta apenas un par di dia pa cuminsa cu e bunita festividadnan aki, Hooyboer–Winklaar a opta pa galardona un persona cu sigur ta merece di ta e prome pa haya e premio aki. Un docente cu a sirbi comunidad a traves di su manera di duna educacion na hopi studiante pa mas di 35 aña, referiendo na Meneer Capelo manera nos tur conoce. Hopi ciudadano ehemplar awe den comunidad, un dia tabata su alumno na Colegio Arubano. Pa hopi aña e tabata docente di wiskunde na Colegio Arubano y mentor pa hopi di nos hobennan.
“Mi ta honra cu e premio aki y sigur ta e prome cu ta ricibi esaki, e ta un simbolo reconoci internacionalmente y ta na su luga pa e docente ricibi tur reconocimento pa su bunita trabao di yuda e hoben pa yega na ta e ciudadano ehemplar cu nos pais merece”, asina meneer Capelo a referi mientras e ta ricibi e bunita pin.
