Covid ta un malesa inespera cu a causa cu hopi hende a perde nan trabou, pero di mesun manera tambe a causa cu creatividad di hende a cuminsa sali pa asina expresa y crea obranan bunita pa sigui bay dilanti y crea consciencia.

Esaki ta e caso di Alex y Fabricio Kartodikromo Wever, un ta Arubiano y otro ta Surnameño, cu a forma un relacion y bay casa na Boneiro pa asina bin Aruba y sigui un bida hunto.

Alexis a conta Bon Dia Aruba cu na e momento cu Covi-19 a yega na Aruba, e tabata traha den sector di entretenimento na un hotel conoci. El a firma un contract pa tres luna, pero door di e crisis e hotel a kibra e contract y el a wordo manda cas sin ricibi ningun tipo di salario. Fabricio tabata traha na un restaurant como chef.

Alex a splica cu na prome momento e tabata pensa cu gobierno por yuda nan cu e programa di ayudo FASE, pero e no a haya esey den tres luna. E tempo aki, e hunto cu su casa a cuminsa uni nan creatividad y crea obranan di arte, figuranan di bestia cu material recicla.

El a splica cu e idea a sali ora nan tabata traha den cura y haciendo nan cushina pafo manera un openbar kitchen y otro cosnan. E tempo ey personanan door di shelter in place a cuminsa haci ehercicio pafo, sali cana pa distrae nan mes y algun di nan a bis’e cu e luga ta parce e isla di un hotel conoci, unico cos cu ta falta ta e flamingo. Algo cu nan a haya gracioso y cu despues nan por ripara cu nan dos por crece hunto trahando obranan cu material recicla.

For di e momento ey, Fabricio a cuminsa traha riba un tubo kibra bieu cu nan tabatin den cura y asina nan a cuminsa traha cu nan man bestianan cu material recicla. El a relata cu bisiñanan tabata pasa y wak nan trabou.

Na medida di tempo nan a bin perfecciona loke nan ta haci, drechando material o figuranan cu segun Alexis a menciona tambe ta usa palo di kwihi.

Alexis y Fabricio a conta cu door cu nan ta biba na San Nicolas y cu nan no tin auto y nan tabata traha na Playa of area di hotel, tur dia semper nan a haya ayudo di amigonan cu ta dispuesto pa nan por sigui bay dilanti. “Mi tin mi friendsnan cu ta apoya mi”.

Tocante loke nan ta haci, el a bisa cu nan ta gusta enfoca riba bestianan pa asina comunidad ta consciente cu e naturalesa. “Pa no laga nan bay perdi. Mi ta biba den mondi banda di naturalesa y mi ta mirando cu akibanda tin pensa di basha tur e naturalesa pa traha cas”, asina Alexis a comenta.

Di mesun manera, el a menciona cu nan ta haya hopi trupial y otro tipo di bestianan cu por mira cu ta buscando cuminda. “Bo ta wak cu nan ta buscando un manera pa sobrevivi y hende ta cabando cu loke Dios a crea. Nos ta cabando cune conscientemente riba Aruba mes en general”.

Na otro paisnan e bestianan no ta wordo molestia. Alexis a expresa cu el a biba na Boneiro y “eynan por mira e bestianan memey di hende y nan no tin miedo di hende. Pero na Aruba nan tin miedo di hende pasobra hende ta haci nan daño”.

Pa e motibo ey Alexis a referi cu el a bin cu e obra cu e hunto cu Fabricio ta haci,, pa comunidad henter realisa cu bestianan tambe t’ey y nan tambe por sigui pa e bunitesa keda. “Pasobra aworaki nos ta cabando cu nan”, el a finalisa.