Ya caba den diferente oficina di e ministernan situa den edificio Cocolishi a cuminsa ruim op tur cos prome cu e miembronan di e gabinete nobo di e gobierno di coalicion MEP-POR-RED lo cuminsa goberna.
Bon Dia Aruba a entrevista e minister demisionario di salubridad publico, Alex Schwengle kende a expresa su satisfaccion di por a forma parti di e gabinete Mike Eman II durante e delaster 4 aña. E ta bisa cu tabata un honor di por a sirbi su pais como minister, pero toch e ta un sacrificio grandi, ya cu no solamente bo ta sacrifica bo bida personal, salud y te hasta salario; den su caso, su salario di minister no ta comparabel na su salario como dokter specialista.
“E tabata un tremendo experiencia, pero duro si mester bisa”, segun e mandatario a expresa. El a bisa cu a prefera su mes pa hopi critica, ya cu lamentablemente politica na Aruba tin biaha nan ta insulta y tira palabranan pa loco, y sin base. Awor cu e no ta mas den gobernacion y tampoco den parlamento. E ta palabrando cu hospital pa bay bek como specialista di pulmon. Sinembargo e tin mas ambicion y e ta sinti cu e tin energia ainda. Un di su aspiracion ta riba parti di maneho, ya sea como director di un hospital, si e ta haya oportunidad pa e funcion aki. Tambe director di AZV, pero e ta aclaria cu no necesariamente e tin di haber cu pais Aruba, sino den un pais bisiña manera Corsou of cualkier otro pais.
Logronan y deseonan
El a bisa cu a pesar di tur logro haci, ainda tabatin deseonan cu no a wordo concretisa of logra. P’esey el a dicidi di core campaña den eleccion ultimo pa sinta un biaha mas. “Ora mi a drenta politica, mi tabatin mi critica pisa ariba area di salubridad”, el a bisa.
Un punto di atencion ta inspeccion riba tereno di salud publico. E ta haya cu a pesar di tur organisacion bo mester tin control. No tabatin un sistema bon di control den salubridad y e ta hopi contento y orguyoso di logra esey. Tambe cuido integral cu ta cana su prome trayecto cu e pashentnan di cuido cronico (diabetes) y nos grandi nan. Pero mester cultiva mas ainda esaki ya cu e ta un proceso di hopi aña. Tambe e proyecto di Scol Saludabel cu a wordo presupuesta pa asina tur scol den tres aña lo mester tin e programa aki andando. “Esaki lo trece e ciudadano no solamente mas saludabel sino mas happy”, segun e mandatario.
Acreditacion
Otro factor importante banda di inspeccion ta esun di bin cu exigencia riba normanan di calidad internacional manera ISO. Pero e introduccion di esaki a resulta di ta mas dificil, segun e mandatario. E ta considera esaki un prioridad y e ta spera cu esaki por haya su atencion den otro gobernacion. Te hasta e ta dispuesto pa duna un panorama pakico nan tabata kier introduci di tal manera. E ta haya cu esaki ta un asunto cu no mester neglisha y den e caso aki bo pais ta mas importante cu bo color politico.
Un motibo tabata cu nan a traha e ley teniendo cuenta cu nos ta un comunidad chikito y nos no por “dicta nos”. Den e caso aki bo mester tin obhetividad den bo normanan y con bo ta controla e normanan. Pa tal motibo mester haci uzo di sistema di acreditacion di cierto paisnan entre nan di Hulanda, pero tambe di Canada of Merca. E ta haya cu e paisnan aki tin’e bon organisa y hancra.
Sinembargo el a laga sa cu na Latino America y den nos region ainda ta falta. Esun cu ta bayendo riba bon caminda ta Colombia, pero ainda nan mester cana un trayecto di casi 2 aña pa bin cu un bon sistema di acreditacion comparabel cu Merca y Europa. “E sistema na Spaño ta laga un tiki di desea”, el a bisa. Esun di Spaña e ta haya cu den ramo di specialista ta bon , pero esun di dokter di cas no mucho bon ainda.
E situacion aki a trece cierto retraso, ya cu si politicamente nan a introduci e AruBIG y nan ta acredita solamente e paisnan Hulandes y cu ta papia Ingles, mientras cu esunnan cu a studia na Latino America lo sinti nan mes discrimina. “Mi no kier discrimina. Pero e problema ta cu na Latino America mi no tin un sistema di acreditacion cu ta cumpli cu tur e rekisitonan cu nos kier. E ta biniendo si!”, el a bisa.
P’esey segun sr. Schwengle- a prefera un poco pa no tuma un decisionnan descabeya ni dictatorial riba e tereno aki, ya cu nan mester tene cuenta kico ta biba paden y pafo di e veld aki.
