Segun Alex Pieters di Motor Unit, e populacion di Aruba ta creciendo y tambe sa di tin mas cu 1 auto awendia den un cas den comparacion cu antes. Actualmente den un mundo moderno, cada mayor cu ta traha tin un auto separa, y hopi biaha ora cu e yiu yega su 18 aña, e tambe ta bay busca su mesun auto. Esaki ta un di e puntonan cu Pieters a trece pa dilanti hunto cu e dilema cu den e manera cu nos pais ta, bo no ta haya cu transporte publico por yega tur caminda.
”A lo menos 60.000 pa 62.000 auto ta coriendo rond na Aruba, esaki ta lagando afo brommer, bus cu truck” Pieters ta conta Bon Dia. E situacion ta birando druk constantemente y esaki ta birando fastioso pa polis tambe cu sa ta pega den trafico.
”Cambionan di construccion no ta bin lihe y ta dificil pa polis y DOW por adapta na tempo. Manera cu e camindanan cu ta riba construccion keda cla e situacion lo alivia un tiki, pero mientrastanto nos mester traha hunto pa no haci e proceso uno desagradabel” Pieters ta conta Bon Dia.
Departamento di Trafico na Aruba
E departamento di “Planologie Politie” ta traha hunto cu DOW pa locual ta pone borchi, mantencion di caminda y luznan di trafico. Nan ta encarga tambe pa locual ta ceramento di caminda ora cu tin actividad nan grandi y hunto cu Motor Unit nan ta zorg pa yuda actividadnan di deporte. Tambe tin un departamento di Trafico cu ta encarga den tuma tur tipo di accidente of dalmento di vehiculo. Finalmente tin e departamento Motorisa cu tambe ta cay bao di trafico anto e departamento aki ta mas encarga den e accion pa locual ta control di alcohol, velocidad y mas.
Antes por ehempel den e districto di San Nicolas, den parti mainta un polis tabata para banda di zebrapad pa tira bista den orario cu muchanan tin cu bay scol pa percura cu trafico bay trankil.
Pero esaki no tabata un polis di trafico, segun Pieters esaki tabata un tarea cu polis mes tabata coopera cun’e y cu no ta haci’e mas pa motibo cu a haci hopi y ta actualmente haciendo mas cambio den proceso pa mehoracion.
Ora cu Polis t’ey so chauffeur ta cumpli cu regla
Segun Pieters ta splica Bon Dia, e control di polis no ta haciendo mucho pa mehora trafico y nan ta buscando un manera pa por afecta e comportacion y actitud di e chauffeurnan.
Cu control di trafico, asina cu polis ta presente tur hende ta comporta nan mes bon y sigui tur e reglanan, pero manera cu polis bay, sinembargo bo ta haya hopi hende keto bay kibra e leynan di trafico por ehempel pasando den luz cora of coriendo sin faha di siguridad segun Pieters.
Actualmente tin un campaña andando hunto cu departamento “Voorlichting & Preventie “pa cuminsa purba di guia e comportacion y actitud di e hendenan y splica nan e manera adecuado pa core den trafico. Cosnan chikito manera teniendo cuenta cu erornan di otro chauffeur tambe ta un factor grandi den e campaña di conscientisacion aki.
E ta bay asina leu, segun Pieters ta bisa, cu ta para den ley cu si bo tin un manera pa evita un accidente e ta bo deber pa haci esaki. Hopi biaha hende ta lubida riba esaki y ta yega bay pasobra nan ta den berde of yega trot pasobra nan tin preferencia y no ta mira bon prome cu nan sigui core. E actitud di hende mester cambia y bay den direccion di mira kico tur por haci pa contribui na un trafico mas sigur na Aruba. Sinembargo, segun Pieters, actualmente bo por mira cu tin hendenan cu si ta poniendo di nan parti pa locual ta mas tolerancia, pasenshi y responsabilidad riba caminda pero cu esaki ainda no ta suficiente.
Tambe por remarca cu esaki ta e prome biaha den e ultimo añanan aki cu nos ta start un aña sin morto den trafico y di parti di Polis ta pidi pa sigui pusha pa mantene esaki pa e resto di e aña.
