Departamento Salud Publico Publico (DVG) a alerta e sector medico pa nan ta atento riba eventual caso di sarampi importa.

Wilmer Salazar di e departamento a laga sa cu ya caba diadomingo ultimo a manda un comunicado pa e sector medico, y tambe pa e sector turistico riba e presencia di sarampi den nos region biniendo for di Europa.

Ta trata di caso importa di sarampi cu ta wordo detecta for di turistanan Europeo of hendenan cu ta bishita e continente aki y ta bin contagia cu e tipo di malesa aki.  E ultimo caso detecta a tuma luga na St. Kitts, unda tin un caso confirma di sarampi di un persona cu a bin for di Inglatera. Na Guatemala tin otro caso cu a wordo raporta di sarampi na e luna aki y den e pais bisiña di Venezuela tin varios casonan tambe.

Alerta
Despues di un reunion cu nan a sostene diasabra ultimo entre departamento di Salud Publico, departamento di Malesa Contagioso y departamento di Epidemiologia pa sigui implementa e sistema di vigilancia cu ta inclui aeropuerto, wafnan, hotelnan, hospital, centro medico pa nan ta alerta pa detecta cualkier caso sospechoso. Pues e caso no mester ta confirma. Sr. Salazar ta haci un yamada na e sector di dokternan pa mantene alerta y informa nan den caso di un caso sospechoso.

Nos autoridad di salubridad ta alerta riba e situacion aki, ya cu nos isla tin mas cu 20 aña cu no ta registra caso na Aruba. Mientras cu na Latino America, Caribe y Nort America e Organisacion Mundial di Salud (WHO) a yega di duna un certificado cu nos region ta eradica di e tipo di malesa di sarampi.

“Nos mester alerta comunidad henter pa ora cu tin caso sospechoso di sarampi confirma pa reporta mesora na instancia di salud concerni pa nos evita cu e lo por plama na otro comunidad”, segun sr. Salazar.

Un bentaha cu nos tin riba e sorto di malesa aki ta cu nos por preveni di dje pa medio di vacuna. Na Aruba 95% di nos muchanan ta protegi. E posibilidad di un epidemia ta minimal na Aruba. El a declara cu e riesgo ta minimo pa no bisa cu e ta nulo of cero. Sinembargo nos mester keda atento pa e turistanan cu ta bin of tambe hendenan cu ta biaha pa e paisnan of area unda e malesa a wordo detecta actualmente.

Un preocupacion cu sr. Salazar a expresa ta cu eventualmente e generacion di dokternan nobo no ta conoce caso di sarampi den e region aki. E ta un malesa causa pa un virus cu ta plama lihe y cu ta afecta mas tanto muchanan. Pero tambe hendenan cu nan sistema di defensa di curpa abou of immuun deficiencia  cu e virus ta ataca nan via e sistema di hala rosea, y despues e ta plama den henter bo sistema di curpa. Si e malesa aki no ta wordo trata di un manera corecto e por ocasiona cu e pashent mester keda interna den hospital y te hasta den un caso extremo e por ocasiona morto. Ya cu e por infecta cerebro locual ta causa meningitis y te hasta e por daña bo riñon.

Algun sintomanan
Unda bes cu e persona ta haya e virus ta tarda un periodo entre 5 pa 7 dia y despues e malesa ta cuminsa manifesta su mes cu keintura halto, curpa full kibra, calafriu, dolor di join nan. Tambe e ta afecta e wowonan of ocasiona wowitis, wowonan ta basha awa y tosamento seco, entre otro sintomanan. Tin biaha debi na e nistermento, tosamento y coremento di nanishi ta haci cu e ta parce influenza, locual no ta berdaderamente.

Sr. Salazar ta pidi e mayornan pa bira mas consciente den caso cu nan tin muchanan cu no a haya e vacuna of e vacuna completo pa tuma contacto cu e departamento di cuido hubenil y nan ta haye por nada. Pa esnan  in intencion di biaha pa e area menciona unda tin sarampi ta wordo conseha pa vacuna prome na departamento di Malesa Contagioso y e vacuna aki tin un prijs di 60 florin.