Merca ta riba alerta pa un tormenta cu lo causa hopi caida di sneeuw den e proximo dianan aki. Mas cu 2 pia di sneeuw por cai riba Washington D.C. Un “state of emergency” a wordo declara den 5 luga caba incluyendo D.C. Scolnan y oficinanan di gobierno a wordo sera caba. Miles di vuelonan a wordo cancela. Hopi hende ta cumprando cuminda y cosnan necesario pa pasa e dianan sera den cas.
Director di National Weather Service a bisa cu tur e ingredientenan a bini hunto pa crea un tormenta cu hopi biento, flooding y tambe “thunder snow” cu ta ora cu lamper ta dal den un tormenta di sneeuw.
E caida di sneeuw, cu lo sigi durante diabierna te cu diadomingo, por causa dañonan den e billones y paralisa e banda oost di merca, asina e director di weather service Louis Uccellini a bisa. Washington ta caminda e lo bay dal mas duro, y New York City tambe lo wordo affecta.
Nan ta pronostica cu pa New York lo cay 8 inches pa 1 pia di sneeuw, Washington 2 pia, Philadelphia un pia pa 18 inches di sneeuw. E caida di sneeuw por ta asina pisa cu lo cay 1 pa 3 inch di sneeuw pa ora y continua pa 24 ora mas.
