For di e ultimo simannan di januari y comienso di februari a constata un aumento den casonan di rash den comunidad.
Dokter Wilmer Salazar di Departamento di Salud Publico di Aruba (DVG) ta informa cu e rash aki ta aparece na henter curpa, incluyendo cara cual ta bin pareu cu grawatamento. Tin algun sintoma adicional, temperatura abou, dolor di wowo, dolor di musculo y di joints, cual ta disparce despues di algun dia.
Tambe sr. Salazar a enfatisa cu como cu tabatin un temporada di awasero activo for di november pa januari, mester vigila e posibilidad di malesanan transmiti pa sangura. Por ehempel, e por ta Dengue, Chikungunya, Zika of otro tipo di enfermedad viral infeccioso of hasta alergia. P’esey e ta bisa cu ta importante pa un persona cu tin e sintomanan aki bay dokter di mas di biaha, pa check kico e rash por ta y cu e dokter por haci e investigacion necesario. El a sigui splica cu ainda DVG ta investigando e causa di e rash aki, pero cu ta tumando e medidanan necesario ora ta trata di un malesa comun of no conoci.
Si un persona tin rash, DVG ta pidi pa notifica su dokter di cas, cual na su turno lo informa Seccion di Malesanan Contagioso. Djey lo sigui cu procedura y lo tuma contacto cu GKMB pa determina si e persona su bario tin of no tin e tipo di sangura cu ta transmiti malesanan manera Dengue, Chikungunya of Zika, cualnan ya ta conoci. Sr. Salazar ta conclui bisando: “Esaki no ta e prome caso di e tipo di rash aki y p’esey nos kier pone comunidad na haltura pa ta alerta y keda vigilante.”
