Mas cu mita di Francia a keda bou alerta oraño pa calor – e di dos mas intenso riba scala. Temperatura halto ta di spera den continente Europeo den siman.
Agencia nacional di tempo ‘meteo Francia’ a bisa cu e ola di calor a cuminsa dialuna y ta spera cu lo dura henter e siman, cu temperatura mas cu 40 grado Celsius na henter e pais ‘e temperatura mas halto ta spera pa diahuebs’.
Na Paris, organisacion di caridad ta riba caya pa asina yuda parti awa na esunnan cu no tin cas. Autoridad local a organisa pa tin luga cu airco pa asina nan por tin un shelter. Meteorologo ta bisa cu ola di calor ta bin pa motibo di biento caluroso cu ta yegando di desierto di Sahara.
A introduci e sistema di alerta na Francia despues di 2003, unda cu a bisa cu 15.000 persona a fayece a e causa di calor, mayoria di nan persona di edad avansa, cu a keda den apartamento of cas pa anciano cu no tabatin airco.
Minister di salud, Agnes Buzyn a bisa cu tur cos ta cla, den cas di anciano, hospital y transportacion. “Aunke tur cos ta organisa, hende ta keda fragil y semper tin un halto porcentahe di persona cu por fayece”, Buzyn a bisa.
Mundial di futbol femenino ta tumando luga na Francia, esaki por trece complicacion pa e hungado di futbol. E precaucion pa tene break pa nan por refresca, of pospone wega pa despues si e calor ta halto. Aunke e wega ta tuma luga anochi.
Ola di calor lo pasa na Belgica, Suisa y Alemania. Cientifico ta bisa cu ola di calor ta biniendo cu mas frecuencia na Europa. Stefan Rahmstorf di Postdam instituto di investigacion pa impacto di clima a bisa cu pa luna tin record di henter mundo ta pasando 5 biaha mas cu den un clima normal.
“E aumento den calor extremo ta loke ciencia ta duna ta un consecuencia di cambio climatico, calor mundial cu ta causa pa aumento di gas cu ta bin di kima carbon, petroleo y gas”, Rahmstorf a splica.
