Alemania y Francia ayera a lansa un proyecto pa set up un plataforma di cloud computing cu nan ta spera lo mehora soberania economico Europeo memey di crisis di coronavirus y kibra e dependencia di e continente riba compania Chines y Mericano.
E plataforma, yama GAIA-X, ta programa pa cuminsa funciona – sikiera den forma prototipo – na cuminsamento di proximo aña y ta habri pa usuarionan di pafo di Europa cu compromete di tene nan mes na standard Europeo. Minister di Economia Aleman, Peter Altmaier a bisa cu e meta ta ‘nada menos cu un moonshot Europeo den politica digital’.
Alemania y Francia lo set up un asociacion non-profit pa coordina y organisa e infrastructura di datonan, Altmaier a bisa. Concebi aña pasa y inicialmente anuncia na october, GAIA-X ta sigui tras di un empuhe existente di e dos economianan mas grandi di Union Europeo pa set up un consorcio di bateria di auto cu meta di alcansa rivalnan Asiatico.
E proyecto di cloud computing no por a yega na miho momento, mientras Europa ta purba di saca su mes di un recesion profundo causa pa crisis di coronavirus, minister di Economia Frances, Bruno Le Maire a bisa.
“E crisis a mustra cu e companianan tecnologico gigante ta e ganadonan… mester protege espacio digital Europeo”, el a bisa, primintiendo cu e plataforma nobo ‘lo sigura aplicacion di regla di politica basa riba balor y standard di UE’.
“Nos no ta China, nos no ta Merca – nos ta paisnan Europeo cu nos propio balornan y nos interesnan economico cu nos kier defende”, Le Maire a bisa.
E dos minister a bisa cu e proyecto a trece hunto 22 compania na Francia y Alemania, incluyendo Dassault Systemes, Orange, Siemens, SAP, Robert Bosch y Deutsche Telekom. Nan no a duna detaye financiero.
Le Maire a bisa cu exito di e proyecto ‘lo ta crucial pa Alemania, Francia y pa Europa pa locual ta trata fortalesa di nos economia, competitividad y soberania’.
