(AP)—E parlamento Aleman a aproba un regla nobo luna pasa haciendo yamado pa buscadonan di asilo ricibi nan beneficio riba un carchi pa usa na tiendanan local pa paga pa servicio. Nan lo por solamente saca un suma limita di cash y no por transferi placa pafo di Alemania. Esaki ta diseña pa preveni migrantenan manda placa na famia y amigonan afo, of pa traficantenan.
Gruponan di abogacion pa migrantenan a critica e regulacion nobo como discriminatorio—specialmente como cu e ta implementa den un pais cu ainda ta opera mas tanto cu cash compara cu otro paisnan Europeo y unda algun negoshi, specialmente restaurantnan, no ta ni acepta pago cu carchi.
Nan ta bisa cu hende huyendo for di guera y persecucion no lo ser stroba di bin Alemania djis pasobra nan no por haya nan beneficio den cash solamente. Al contrario, nan ta bisa cu e carchinan di pago lo singularisa migrante y por aumenta nan chens pa ta exclui mas ainda.
“Mester bisa claramente cu hende ta biniendo pa via di guera civil y persecucion—un carchi di pago no ta bay strobanan di haci esaki,” segun Wiebke Judith di Pro Asyl. “E meta akinan ta pa crea un instrumento di discriminacion y pa bully refugiadonan.”
Alemania tin tempo ta purbando di reprimi migracion, y e ultimo medida aki ta bin algun siman prome cu e eleccion di Union Europeo dia 9 di juni. E partido ultra-derechista Alternative for German, of AfD, ta explotando exitosamente e actitudnan conservativo contra migrante. Ta anticipa cu AfD, ken ta tuma un posicion anti-migracion, lo haya ganashinan significante compara cu e 10.3 porciento cu e partido a gana durante e ultimo eleccion federal na 2021.
Actitud riba migracion a empeora na Alemania como cu un cantidad di buscadonan di asilo a yega e pais, ademas di refugiadonan for di Ucrania, y autoridadnan local no ta logra haya suficiente acomodacion.
E cantidad di hende aplicando pa asilo na Alemania aña pasa a aumenta pa mas cu 350,000, cual ta un aumenta di un tiki mas cu 50 porciento compara cu e aña anterior. E cantidad mas halto di buscadonan di asilo a bin for di Siria, sigui pa Turconan y Afganonan.
Na januari, legisladonan a aproba legislacion diseña pa facilita deportacion di buscadonan di asilo cu no a logra haya permiso. Canciyer Aleman Olaf Scholz a bisa repetidamente cu autoridadnan mester acelera deportacionnan.
Alemania, manera varios otro paisnan Europeo, tambe a cuminsa clasificando algun pais, manera Moldova y Georgia, como “paisnan di origen safe”—kiermen cu buscadonan di asilo di e paisnan ey por ser rechasa y deporta mas lihe compara cu den pasado.
E legislacion nobo ta duna autoridadnan local latitud espacio pa dicidi riba exempcionnan y con hopi cash buscadonan di asilo por saca.
