(AP) – Esunnan cu ta campaña pa marihuana den Alemania a huma marihuana como celebracion di e pais su legalisacion di posesion di cantidadnan chikito di cannabis pa uso recreacional a pesar di obhecion di dokter y polis.
German Cannabis Association, cual a campaña pa e ley nobo, a organisa un ‘smoke-in’ na Brandenburg Gate na Berlin ora cu e ley a drenta na vigor marduga. Otro eventonan di consumo publico tabata programa na henter e pais, incluyendo uno dilanti e catedral Cologne y otronan na Hamburg, Regensburg y Dortmund.
Alemania ta bira e tercer pais den e union Europeo pa legalisa cannabis pa uso personal despues di Malta y Luxembourg. Gobierno a argumenta cu e legalisacion aki lo kita balor di e trafico criminal, duna proteccion contra impuridadnan dañino y duna e polis mas tempo pa crimennan serio mientras e ta provee proteccion contra uso pa muchanan bao 18 aña.
E ley nobo ta legalisa posesion pa adultonan te cu 25 gram di marihuana pa uso recreacional y ta permiti individuonan cultiva te hasta 3 mata nan mes. Ta prohibi uso dentro di 100 meter di e entrada di un scol. Esaki tur ta forma parti di e legislacion cu a drenta na vigor dialuna.
Residentenan Aleman di 18 aña of mas lo ser permiti pa join clubnan di “cannabis” cu un maximo di 500 miembro cada un, cuminsando for di juli 1. Individuonan lo ser permiti cumpra te hasta 25 gram pa dia y un maximo di 50 gram pa luna, un cantidad limita na 30 gram pa personanan cu menos di 21 aña. Tampoco lo permiti ta miembro di mas cu un club. E club su gastonan lo ser cubri pa e tarifanan di miembresia, cual mester ser dicta pa e cantidad di marihuana cu e miembro usa.
E legislacion tambe ta haci yamado pa amnistia bao cual e sentencianan pa e ofensanan relaciona cu cannabis cu no lo ta ilegal mas mester keda reevalua y den varios caso retira. Autoridadnan regional ta preocupa cu e sistema hudicial lo keda sobrecarga pa e miles di casonan.
