(AP) — Autoridadnan Aleman a lansa proceduranan contra Telegram cu por mira e operadornan di e app di mensahe ricibi multa pa faya di cumpli cu leynan cu ta rekeri plataformanan di rednan social pa vigila accionnan di nan usarionan.
Revista Aleman Der Spiegel a reporta durante weekend cu oficialnan ta kere cu uso di e app Telegram a alcansa un nivel unda por trata esaki igual cu Facebook, Twitter y TikTok ora ta trata di rekeri cooperacion cu autoridadnan Aleman.
Un vocero di Ministerio di Husticia a confirma dialuna cu autoridadnan a skirbi na operadornan di Telegram na Emirato Arabe Uni tocante su fayo di duna un canal pa entrega keho, y un persona di contacto na Alemania. “E compania awo tin e oportunidad pa responde”, segun e vocero, Rabea Boennighausen a bisa reporteronan na Berlin.
Der Spiegel a reporta cu e compania ta enfrenta multa di hasta 5.5 miyon euro si no cumpli cu e rekisitonan.
Telegram no a responde inmediatamente na un solicitud pa comentario.
Telegram, funda pa rumannan Ruso, Nikolai y Pavel Durov, a crece den popularidad na Alemania den añanan recien, incluyendo entre gruponan di derecha y esnan opuesto na e respuesta di gobierno pa cu e pandemia di coronavirus.
Parlamento Aleman a pasa e Network Enforcement Act na 2017, declarando como meta pa sigura cu e limitenan existente riba expresion na e pais, incluyendo un prohibicion pa hopi tempo riba nenga veracidad di Holocaust, por wordo cumpli online.
Oponentenan a argumenta cu ley ta pone den riesgo libertad di expresion.
