Alemania a bay di acuerdo pa caba cu su dependencia riba stacionnan di carbon pa aña 2038, den un decision hopi anticipa cu lo tin implicacion mayor pa e intentonan di Europa pa logra su metanan pa cambio climatico acorda na Paris.

E pais ta e ultimo bastion di kimamento di carbon na nort- west di Europa, y e combustibel fossiel di mas sushi ainda ta provee 40% di energia pa Alemania, compara cu 5% na Reino Uni, cual tin plan pa stop uzo di carbon completamente pa 2025.

Despues di combersacionnan anochi, e comision Aleman di salida di carbon, cu 28 miembro for di e industria, politiconan y NGO, cual a traha desde berano ultimo pa crea un calendario pa stop uzo di carbon, a acorda e fecha final pa 2038. Un revision na 2032 lo dicidi si e fecha

Hans Joachim Schellnhuber, un miembro di e comision y consehero di e canciyer Aleman, Angela Merkel, a bisa: “Esaki ta un paso importante riba e caminda na e era post- fossiel – un paso cu tambe ta habri perspectivanan nobo pa e regionnan afecta mediante cambio structural impulsa pa innovacion.” Pero el a bisa cu ta dificil pa logra consenso riba con lo deshaci di carbon rapidamente.

RWE, kende ta maneha mayoria di e plantanan di carbon di e pais, a bisa cu e fecha di 2038 ta ‘demasiado trempan’ pa e compania, y a bisa cu e revision di 2032 lo ta un oportunidad pa extende e fecha final. Den un declaracion, e compania a bisa cu e propuestanan ‘lo tin consecuencianan amplio pa e sector di energia Aleman, y particularmente pa RWE’.

Rolf Martin Schmitz, hefe ehecutivo di RWE, a adverti cu e plan lo tin ‘consecuencia serio’ pa e negoshi di carbon bruin di e compania.

Miembronan di union di carbon a ricibi un reunion di e comision di salida di carbon na Berlin diabierna cu un demostracion contra un fin den pura.

Mientras tanto, miles di mucha di edad escolar a participa den un protesta e mesun dia den capital Aleman, pidiendo un fin di uzo di carbon pa combati cambio climatico.

E documento final di 336 pagina, cual a wordo acorda pa e comision di carbon, segun The Guardian cu tabatin acceso na dje, ta mustra cu Alemania tin plan pa reduci su capacidad di 42.6GW di poder di carbon pa como 30GW pa 2022, un caida di 17GW pa 2030. E acuerdo lo wordo publica formalmente diabierna proximo.

E comision a bisa cu gas lo bira e substituto na Alemania, na luga di carbon, cu lo haci e sistema mas similar na esun Britanico.

Merkel, papiando na Davos siman pasa, a bisa cu, mientras e pais ta stop uzo di carbon y ta cera su ultimo plantanan nuclear na 2022, ‘nos lo tin mester di mas gas natural, y energia mester ta mas economico’. Su gobierno tin como meta crecemento di e cantidad di energia renobabel den su suministro di 38% awendia na 65% na 2030.

Un di e asuntonan mas contencionso ta e costo di compensa companianan di energia pa cerca plantanan di carbon prome cu nan yega su fin. Como 40 biyon euro lo wordo duna segun e plan di e comision; e industria tabata spera pa 60 biyon euro. E secretario di energia Aleman, Thomas Bareiß, a bisa cu e cambio for di carbon ta necesario, pero lo ta ‘un transicion hopi caro’.