(AP) – Actor Alec Baldwin a entrega un demanda civil pa persecucion malicioso y violacionnan di derechonan civil den e tiro fatal di cinematografo riba set di grabacion pa e pelicula “Rust.”
E demanda entrega diahuebs na corte di districto na Santa Fe, unda un hues den juli a retira e caso di homicidio involuntario contra Baldwin den e fayecimento di cinemtografo Halyna Hutchins. Baldwin tambe ta acusa difamacion den e demanda, bisando cu e fiscalnan y investigadornan intencionalmente a maneha incorectamente evidencia mientras nan tabata persigui e caso.
E acusadonan nombra den e demanda ta fiscal special Kari Morrissey y Santa Fe District Attorney Mary Carmack-Altwies, conhuntamente cu 3 investigador for di Santa Fe County su cuerpo policial y e directiva di comisario.
“E acusadonan a busca tur manera pa culpa Baldwin pa e actonan y negligencia di otronan, sin importa e evidencia of ley,” e demanda ta acusa. Tambe e ta bisa cu fiscalnan y investigadornan a bay contra Baldwin pa ganashi politico of financiero.
Hutchins a fayece como despues di a ricibi su heridanan durante practica pa e pelicula den october 2021 net pafo di Santa Fe, New Mexico. Baldwin, ken tabata e actor principal, a apunta un arma di candela contra Hutchins ora cu esaki a dispara, causando e fayecimento di Hutchins y heridando e director Joel Souza. Baldwin a bisa cu e no a primi pa los tiro.
Baldwin su huicio a keda stroba pa revelacionnan cu e municion a ser hiba na Santa Fe su departamento di polis den maart pa un homber ken a bisa cu esaki por ta relaciona na e asesinato di Hutchins. Fiscalnan a bisa cu nan a declara cu e municion no tabata relaciona ni importante pa e caso, mientras cu Baldwin su abogadonan ta bisa cu e investigadornan a “dera” e evidencia den un caso separa y a entrega un mocion exitoso pa retira esaki.
Morrissey a bisa cu el a haya sa mas cu un aña atras cu Baldwin tabatin un demanda bao consideracion.
“Den october di 2023 e ekipo di fiscal a haya sa cu Mr. Baldwin tabatin e intencion di entrega un demanda civil,” el a conta The Associated Press. “Nos ta prepara pa nos dia den corte.”
Carmack-Altwies y Santa Fe su departamento di polis no a responde inmediatamente na peticion pa comentario. Baldwin su demanda ta argumenta cu e fiscalnan no mester tin inmunidad den nan rolnan oficial. E procurador general di e estado a nenga persigui un apelacion na e retiro di e caso, causando cu esaki a keda completamente cera den December.
Por separa, e tiro involuntario a causa un condena na un huicio aña pasa contra e supervisor di arma di candela Hannah Gutierrez-Reed. E ta cumpliendo un condena maximo di 1 aña y mey na prizon di estado.
E demanda di Baldwin tambe ta critica un fiscal special cu inicialmente a monitor e investigacion, mientras cu e tabata pidi dañonan no specifica, compensacion di dañonan, cubri e gasto di abogadonan y interes.
E ta agrega na un cantidad di litigacion post-huicio, aunke Baldwin a bolbe na presentacionnan comico riba “Saturday Night Live” cu plan na caminda pa un show di television cu su casa Hilaria y nan 7 yiu.
E mayornan y ruman chikito di Hutchins a demanda Baldwin y otro productornan di Rust den corte di estado di New Mexico. Un acuerdo a ser yega den demanda di Hutchins su viudo y yiu homber.
