Cinco aña pasa dia 22 di februari 2012  dos Colombiano, Alcides Peralta y Benjamin Castro a perde nan bida den un accion policial na altura di Renaissance Marketplace. Te ainda e famia ta den frustracion pa haya husticia na Aruba y ta haya e minister di Husticia culpabel di stroba e proceso.

Pa Angelo Peralta kende ta e yiu mas grandi di Alcides Peralta, e cinco añanan aki a nifica p’e y pa e famianan di e victimanan un fortalecemento y union entre nan mes, pero tambe un lustro di frustracion hudicial, ya cu te ainda e caso aki no a wordo aclaria debidamente y tampoco a produci responsabel.

E ta señala directamente minister di Husticia di Aruba como e persona cu a uza su poder pa stroba e proceso aki hudicialmente for di e mesun momento cu nan a lanta un caso contra pais Aruba.  Pero tambe el a cuestiona e rol di Ministerio Publico (OM) cu a percura di desvia e investigacion den e caso aki. El a indica cu e for di e tempo aya, ya caba e retiro di Taco Stein como fiscal mayor  di Aruba no tabata puro casualidad. Sino cu ora sr. Stein a mustra un interes grandi pa aclaria e caso aki y señala e berdadero responsabel, ya cu el a ripara cu tabatin un fayo den e operacion policial aki, nan a core cu ne. “E ta un lucha contra un gobierno cu a pesar cu nos a presenta tur prueba den nan contra; nan a haci uzo di tur e bentaha cu nan tin unda nan ta parti di e caso y hues tambe.  Nan no a wordo husga sino al contrario nan ta husga nos”, asina sra. Peralda a declara durante un entrevista cu Bon Dia Aruba.

Caso civil y caso penal
Segun e yiu, aunke den e sentencia di hues na luna di januari ultimo a wordo papia di un eror di polis, y e ta haya cu loke a sosode cu su tata Alcides y cu Benjamin tabata un “vil asesinato unda tur forsa a wordo uza”.    E ta indica cu  e mandatario di Husticia a trata di  prolonga e situacion aki, y e no sa te hasta ki punto e gobierno di Aruba ta purba di haya un veredicto na nan fabor. E famia Peralta mescos cu e famia Castro a entabla dos proceso hudicial. Un di nan a wordo entabla den Corte di Aruba caminda via un caso civil nan a exigi un compensacion pa e daño causa.  Corte a duna un veredicto faborabel na banda di e victimanan y contra pais Aruba (Gobierno), caminda nan a pidi pa indemnisa e famianan pa e dañonan causa. E veredicto aki a cay dos aña pasa y despues pa ordo di minister di Husticia,  Ministerio Publico a apela e veredicto aki. E caso a bay pa Corte Superior na Corsou y e no sa mes kico a sosode den e corte aki ya cu nan a ricibi un  fayo den nan contra. Ya cu e ta haya cu e decision final aki a refleha e “corupcion di e gobierno y e mal intencion di minister di Husticia contra nos”, segun sr. Peralta.

Casacion
Despues di e fayo aki nan a dicidi consulta un abogado cu a conseha pa sigui cu e caso aki; y actualmente via un proceso civil nan tin nan caso den e tribunal di casacion cu ta e delaster instancia hudicial cu mester emiti un decision.  “Nos ta wardando y cu confiansa den Dios cu e corte aki no lo wordo influencia pa e interesnan cu e Gobierno di Aruba tin.” Nan ta spera cu e corte di casacion aki -cu nan ta haya un instancia “totalmente imparcial”-  lo tin na cuenta e violacion di e derechonan humano y exceso di forsa policial y uzo di arma di candela. E caso aki lo wordo entrega na cuminsamento di maart na corte di casacion.

Nan tin un caso civil y tambe nan a inicia un caso penal  pa agota tur recurso legal cu tin. Ya cu e fayo di Corte Superior na Corsou a bisa cu nan no por haya reparacion via un caso civil, sino cu esaki mester bay via un proceso penal. E ta haya cu e minister di Husticia su interes ta pa e famia di e victimanan lo wordo repara via un caso penal, ya cu  e suma di reparacion cu nan mester paga pa e dañonan cometi ta menos.  Ya e veredicto a tuma luga na inicio di januari ultimo caminda hues di corte di Aruba a faya na fabor di e famia di e victima reconociendo cu polis a comete un fayo; y cu mester indemnisa e famia no cu 600 mil florin sino cu alrededor di 60 mil florin. Esaki debi cu no a keda demostra e fuente berdadero di entrada di placa di e dos victimanan. “E ta un reparacion miserabel. Alcides Peralta y Benjamin Castro no ta bal ni 10 mil ni 20 mil, ni 30 mil florin”, e yiu ta bisa.

‘Vil asesinato’
Angelo Peralta ta aclaria cu e ta un empresario exitoso den su pais  y cu  nan no ta un famia di delincuentenan.  E ta lamenta cu den e veredicto a pone den duda e integridad di su tata. Ya cu di otro banda, no a keda demostra den e veredicto aki cu su tata a forma parti di e mundo di narcotrafico. Tampoco te aworaki nan no a ricibi niun acta of documento cu mester a realisa un fiscal special caminda mester a aparece e cantidad, calidad y tipo di droga cu supuestamente a aparece den e auto varios dia despues cu Alcides y Benjamin a wordo mata; y pa tal motibo nan a wordo acusa di narcotrafico.

Pero den niun di e dos casonan tanto penal como civil no a wordo presenta prueba suficiente pa demostra cu e hallazgo di droga ta un realidad, segun Angelo Peralta. Tampoco e famia di e victimanan no a wak e solicitud di detencion di Alcides Peralta y Benjamin Castro di parti di DEA di Merca, manera a wordo informa inicialmente cu e caso aki a sosode 5 aña pasa. E ta lamenta cu e figura internacional di e “cadena di proteccion of custodia” di e pruebanan  no a wordo aplica riba e pruebanan aki, pa evita cu nan no wordo contamina of mishi cu ne ni kibra tampoco, ya cu sino e  prueba ta perde su validez.  “Mi no a wak e documentonan aki, tampoco mi abogadonan.”

Sinembargo loke mas a indigna e famia di e victimanan aki –segun Angelo Peralta- ta e echo cu un biaha mas minister di Husticia a apela e veredicto aki di e caso penal cu tabata na fabor di nan. “Nan no kier reconoce cu loke a sosode tabata un asesinato sin tene na cuenta e dolor di e victimanan.”

El a recorda cu e victimanan  a haya 77 tiro di bala, y no uno of dos tiro, sino cu practicamente polis a practica tiro al blanco cu nan. Peralta a bisa cu esaki ta e esencia di nan lucha. Nan kier pa gobierno di Aruba  publicamente ta reconoce cu nan cuerpo policial a comete un eror; y cu nan ta expresa nan disculpa pa e daño cu nan a causa na e famia di e victimanan. Ya cu a pesar cu lo por bin un reparacion material “e reparacion aki no lo ta total si nan no ta pidi pordon cerca nos. No tin olvido sin pordon”; segun sr. Peralta.

Bon Dia Aruba tambe lo busca e banda di Ministerio Publico y minister di Husticia pa reacciona riba e comentarionan y acusacionnan haci pa e famia di e dos Colombiano.