Alcaldenan kier un politica pa shelter tur solicitante di asilo incluyendo di Ucrania y Africanonan

(NLTimes) – Hubert Bruls di e Conseho di Siguridad, e conseho di e alcaldenan cu ta maneha Hulanda su 25 regionnan di siguridad a bisa cu mester maneha e recepcion di refugiadonan di Ucrania y solicitantenan di asilo hunto. E dos fluho di recepcionnan aki ta separa actualmente, cual no ta sostenibel pa motibo cu e cantidadnan ta keda aumenta. E prognosis ta cu 200,000 persona lo hui bay Hulanda pa fin di proximo aña.

E coordinacion di e recepcion di personanan di Ucrania actualmente ta tuma luga via e regionnan di siguridad. Solicitantenan di asilo ta e provincia su responsabilidad. Esaki mester bini bao un solo politica segun Bruls, ken tambe ta alcalde di Nijmegen. Con lo haci esaki te ainda ta bao debate.

E alcaldenan tambe ta preocupa tocante educacion y cuido medico pa personanan di Ucrania. Tin demasiado tiki docente y dokternan di cas no por keda acepta pashentnan nobo indefinidamente. “Nos mester ta flexibel aki. Si educacion regular no ta posibel y e unico opcion ta un bon creche of nada, eora mi lo scohe e creche,” Bruls a bisa.

Hulanda actualmente ta aceptando mas o menos 700 refugiado di Ucrania tur siman. Segun reglanan Europeo, nan por biaha libremente den Europa. Nan ta ricibi un suma pa por cubri cierto gastonan, un luga unda pa keda y por cuminsa traha inmediatamente. Bruls a señala cu esaki ta causando cada biaha mas y mas discusion. Tur otro solicitantenan di asilo mester drenta Hulanda via e centro na Ter Apel y mester haci hopi mas trabao prome cu nan por tin acceso na cualkiera di e beneficionan aki. “Hopi biaha nan ta biba den mal condicion. Bo por critica esaki.”

E kier pa e ley di distribucion di asilo keda implementa rapidamente pa preveni mas problema. Colega Ahmed Aboutaleb di Rotterdam tambe a argumenta pa inmediatamente implementa e ley riba dia 1 di januari. “Scohe e ruta mas cortico entre A y B, sin cu tin hopi otro ruta pa yega na esaki,” el a splica. E fluho di personana di Ucrania ta birando mas nivela, sinembargo hopi persona te ainda ta coriendo for di nan pais. Kico lo pasa cu Iran y su inkietud actual?”