(NLTimes)—Alcalde di Amsterdam Femke Halsema a adverti cu Hulanda ta den un punto critico unda politica di droga internacional y nacional ta chocando cu traficacion di droga internacional, cual “a bira mas lucrativo, profesional y violento.”

El a urgi atrobe cu e problemanan cu Hulanda ta enfrentando ta mustra cu “e guera riba droga no ta productivo,” bisando cu autoridadnan internacional mester reconoce esaki urgentemente. “E prohibicion di droga ta proteha den tratonan internacional cu ta limita e espacio pa politica di droga nacional, cual ta nifica cu nos mester traha aliansanan internacional nobo pa priorisa salud y siguridad riba medidanan penal,” el a continua. “Esaki por rekeri tira un bista atrobe na e tratonan aki, y desaroya un acercamento global pa “politicanan di droga innovativo y cu ta rondona salud.”

Su piesa den e corant Britanico por ta sorprendente pa esnan cu ta asocia Halsema solamente cu su intentonan recien pa limpia e Red Light District, y pa haci e centro di ciudad mas calmo por medio di lansa campañanan bisando bishitantenan Britanico pa no biaha bay Amsterdam. Pero Halsema, ken ta den oficina desde 2018, a mantene e posicion aki pa varios aña. Na 2022, el a contra un conferencia ministernan for di Belgica, Francia, Alemania, Italia y Spaña cu e politica di haya droga y confisca droga simplemente no ta trahando. E congreso di Amsterdam a ser organisa pa minister di husticia Dilan Yeşilgöz-Zegerius. Aña pasa, el a adverti e Conseho di Ciudad cu crimennan relata na droga lo aumenta siguramente dentro di e decada binidero.

Den su articulo publica diabierna, Halsema a nota cu Hulanda tin biaha no ta streng riba hende gara cu un cantidad di droga. El a splica tambe kico a pasa ora presion internacional a causa e pais pa haci MDMA ilegal inclui riba e lista di Opium Act, a pesar di su opinion di e naturalesa “relativamente suave” di e droga. “E cambio a contribui na e rentabilidad di produccion ilegal di MDMA y a crea un modelo di negoshi lucrativo pa organisacionnan di crimen, manera a ser prueba pa e 18.9 biyon euro den balor di caya di produccion anual di ecstasy na Hulanda. E exprencia aki ta revela con esfuersonan pa alinea cu trendnan di prohibicion global por tin resultadonan no productivo,” el a skirbi.

Sin accion global, Hulanda ta enfrenta un caminda duro mirando e desaroyo di comercio internacional di droga. E desaroyonan ey tin un efecto “desastroso”, el a bisa. E violencia no ta afecta criminalnan mas. Awo muchanan di apenas 14 aña ta ser gara mientras nan ta yuda extrae envionan di cocaina por medio di drenta wafnan Hulandes. E situacion a empeora, Halsema a bisa. Mas cu 29,700 kilogram di cocaina a ser confisca na e waf di Rotterdam durante e prome mita di 2023, un aumento for di 22,000 durante e mesun periodo un aña prome. Cu asina tanto placa di droga drentando e pais, e capital ta birando un centro di hefenan di droga y lidernan di organisacionnan criminal pa laba placa, manda esaki na depositonan di impuesto y plama esaki den real estate, servicio di negoshi y hospitalidad.

Halsema a anuncia den pasado e conferencia Dealing with Drugs den e ciudad, cual lo tuma luga dia 26 di januari na Beurs van Berlage. Speakernan lo inclui ex-alcalde di Bogota, Claudia Lopez y alcalde di Milan Guiseppe Sala.