Siman pasa World Taekwondo Federation WT a organisa un curso pa coach Level 1 den e Disney Wide World of Sports na Orlando. E curso a wordo duna completamente den e idioma di Ingles. E curso tabata dos dia.
E curso tabata basa riba e ultimo reglamento nan Internacional cu WT a implementa y a termina cu un examen di 20 pregunta na Ingles. Cu e certificado di coach aki bo por coach bo atleta na cualkier evento di G1 y G2 rond Mundo.
Master Alberto Klabér a tuma e curso aki pa asina e por ta na altura di e cambionan cu tin y pa e pasa esaki bek na e team di Aruba cu sa train hunto cu Brazil Taekwondo Stichting. Ex Campeon Mundial, coach Olimpico y Hall of Fame, Master Henk Meijer a tuma e curso aki mirando cu e ta coach e rumannan Klabér Mundialmente y e mester sa tur informacion cu tin di Taekwondo.
Mr. Fernando Cañada for di Argentina a duna e parti di Competition Rules I, Games Management, PSS y Score Board. Mr. Kim Myungchan a duna e parti di Competition Rules II, WT History, Culture and Structure from Administration, Safeguarding, Medical, Emergency Case y Anti Doping.
E curso ta bale la pena pa tuma pa asina bo ta y keda bon informa. WT ta avansando y tur curso lo wordo duna solamente den e idioma di Ingles. Esaki ta haci cu esunnan cu no por lesa, skirbi of papia Ingles lo no por pasa e examen cu ta wordo duna completamente na Ingles.
Den e curso tabata tin coach nan for di rond Mundo cu a bay Orlando pa tuma esaki. Na Costa Rica ta bay tin curso Level 2.
