Dia 27 di maart, a traves di un potret hopi sensitivo di Luna Foundation Aruba Inc., Aruba a conoce un caso di maltrato di bestia cu a bay viral unda tabata ilustra e situacion di un mama cacho y su puppies. Bon Dia Aruba a bay busca e otro banda di medaya, unda a logra entrevista Alberto Groeneveldt, e doño di e cacho cu a muri cu tabatin e nomber di “Blaky” pero el a bira conoci como “Khaleesi.”
Den e ehercicio di periodismo responsabel mester scucha e dos banda. Den e caso aki, a busca e derecho di replica (Hoor en wedehoor) di Groeneveldt varios siman atras, pero no por haya ni un reaccion di dje. Finalmente par dia atras el a acepta di bin dilanti cu tres medio di comunicacion so (Telearuba, Viral 297 y Bon Dia Aruba) pa conta su historia.
Groeneveldt a cuminsa e entrevista pidiendo “un disculpa na tur hende na Aruba y tambe mundialmente di e sucedido cu a pasa na mi cas, e ta algo cu ta un fout, un negligencia,” el a sigura.
Den su opinion, Groeneveldt ta sigura cu e no a maltrata su cacho, ni a dal e, ni a bati e. E ta afirma cu e tabatin mas cacho den su cura di cas cu tambe tabata mara y tabatin e mesun cadena y otronan tabata los, segun e ta conta.
E ta continua splica cu e mester a mara su cacho pa motibo cu den su bario tin problema y ta zundra over e cachonan cu tabata los. “A yega un punto cu mi tabata traha asina hopi, mi ta asina bezig cu m’a mara un par di cachonan cu nan tabata keha mas tanto di dje. Lamentablemente esey a pasa den mi cura, for di day one mi a tuma mi responsabilidad, mi a bisa Luna Foundation kico por haci? Den kico mi por aporta of paga pa asina mi por tuma over mi cacho “Blaky,” esey ta su nomber.”
Groeneveldt ta señala cu e cacho su nomber a wordo cambia y comercialisa pa “Khaleesi” y segun e ta splica, “loke a pasa ta duel mi, pasobra mi no ta un persona cu ta maltrata animal, mi ta stima bestia. Den total mi tin 11 cacho, conenchi, pisca, turtuga. Si mi tabata un ‘animal killer’ mi no tabatin tanto bestia na cas.”
Tambe el a sigura cu for di aña pasa y 17 di januari ultimo, el a pidi ayudo pa cu un par di cacho, unda e ta señala cu “lamentablemente mester a cuminsa mara un par, pasobra nan ta cacho cu no ta keda keto. Nan ta mucho hyper y esey ta loke a pasa. E no ta algo cu mi a haci planifica, e cacho a wordo neglisha. Mi no ta na cas hopi at all, mi a spera cu hendenan cu tabata na cas por a haci esey y cuida nan. Ta duel mi hopi con e cos a cambia y el a bira, mi curason ta lamenta di tur e sucedido aki.”
Pa loke ta trata e caminata cu varios fundacion cu ta encarga di rescata animal a haci fin di siman ultimo den honor na “Khaleesi” – manera e cacho a keda conoci – segun Groeneveldt tabata pa conscientisa pa motibo cu “tin hopi negligencia cu ta pasando den tur aspecto akinan. Ta duel mi cu a mi ta esun cu ta un figura publico, cu tur hende mi conoce, a lastra mi asina ey; OK, pero haciele ora hende no ta neglisha solamente bestianan sino tur cos cu tin,” el a bisa.
Siman pasa tambe a bira conoci un caso di un otro cacho cu tambe a muri debi na consecuencianan di maltrato y pa esaki Groeneveldt a indica cu esey ta un otro negligencia grandi. “Dicon nan no a lastra e persona ey? Dicon nan no a ponele riba Facebook y no a caba cune manera a pasa cu mi? Mi ta un hende cu ta traha duro y mi ta purba bay dilanti, nos tur tin debe y cosnan pa paga. Aruba ta dificil, pero awor a haciele mas dificil. Ban enfoca en general, riba tur nos animal cu ta den negligencia, negligencia ta pasa den tur aspecto, cu nos mayornan, cu hende grandi, cu muchanan cu ta wordo abusa; pasobra si ami ta un abusador di animal, dicon bo a bay cu un so e dia ey y no a bay cu tur?”
El a señala cu el a logra papia cu Zoey Conijn di Luna Foundation y cu Crijojo Trappers Aruba y el a duna algun cacho pa nan bay cu nan, “pero mi a pidi pa bay cu tres cu ta esun ultimo cu a bay. Esey ta e yudansa cu mi no ta compronde y mi tin otro cachonan na cas awor.”
Igualmente, Groeneveldt ta sigura cu esaki no ta e unico caso cu a pasa sino cu tin hopi mas. “Di casonan mas erg cu esey, pero pakico usa a mi, mi historia, mi cacho pa comercialisa esaki pa haci politicamente, economicamente, di tur sorto di formanan. [Djis enfoca] riba e parti importante cu ta conscientisa nos ciudadanonan. Tur hende na Aruba cu e waya largo no ta bon, pero ya, nos tin cu mara nos cacho si bo no tin un luga adecua pa nan core rond.”
El a menciona cu su situacion financiero a bay atras. “Lamentablemente 95% di hendenan a cancela mi contractnan, tur sorto di cos cu mi ta haci diariamente. E ta hopi tristo cu a usa mi persona pa esaki y e noticia mes a wordo cambia pa ataca mi persona y haci cos hopi pio pa mi bida personal, cu hasta menasa di morto mi a haya di hendenan cu mi tabata yuda,” el a declara.
Manera Bon Dia Aruba a informa recientemente, autoridadnan ta bezig cu e caso aki y pa esey Groeneveldt a sigura cu “mi no sa si e ta bay asina leu, pero si ta bay asina leu ya, mi ta para p’e. Mi ta para pa loke a pasa na mi cas. Nan a drenta den mi cas sin mi permiso pa rescata e cacho, por lo menos nan por a yama mi. Tur hende ta conoce mi cachonan den bario, mi no mester a tene asina tanto y mi tabata kere mi tabata haciendo the right thing, pero el a bay fout.”
“Mesun esfuerso cu a haci, dramatisacion, cana rond y haci T-shirt, protesta y ataca mi di tur sorto di manera, mi kier sa pueblo si asina con mi ta sinti aworaki pa un fout mi a wordo haci, si asina ta haciendo cu tur otro hendenan.”
Aunke e ta sigura cu tabata su fout, sinembargo, den e potret cu a bay viral por a mira e daño den e nek di e cacho cu tabata basta grandi, pa e motibo ey a puntra: si tabatin hende na cas, manera e ta sigura, con e situacion a caba di e forma ey, cu hasta e weso di su nek tabata mustra? Pa esaki, Groeneveldt a sigura cu “den cas nos tin hendenan cu ta bin y bay, normalmente semper tin hende na cas, semper tur tabata apoya mi cu tur e animalnan, mi no por splica kico exactamente a pasa pasobra mi no tabata t’ey, e ta un negligencia y mi ta para p’e.”
Pa finalisa, el a laga como mensahe “Pueblo di Aruba ban stop di caba cu otro, ban stop di haci e situacionnan of dolor di otro hende un sensacion of politico, enfoca riba loke ta mas importante y please wak bo mes y wak bo cas.”
