ORANJESTAD – Aruba ta conoci rond di mundo pa su cantidad di beachnan bunita, santo blanco y e atencion di e hende Arubiano cu cada dia ta pone su esfuerso pa trata di e miho manera e turistanan, pa asina nan lo por bolbe Aruba den futuro.
Na Aruba tambe e turistanan y persona cu ta biba riba isla por disfruta di tur e actividadnan cu e compania di watersports ta ofrece, como jetsky of parasailing. Bon Dia Aruba a haci un entrevista cu Alberth Maduro, cu ta trahado di watersports na Aruba desde bintishete aña pasa, ora el a cuminsa traha na un compania y traha cu e turistanan. El a expresa cu su motivacion ta cu esey tabata algo cu semper el a gusta, specialmente e parasailing. Desde dos aña pasa, el a cuminsa cu su mesun compania di watersport, el a splica con e turismo tabata e tempo ey y con el a bira te e tempo di awendia.
El a expresa cu ‘e turismo di aña nobenta tabata sublime. Pa cada tres aña e turismo ta cambia’, e compania di turismo a ricibi hopi cambio, e sistema a cambia. Sinembargo, despues di aña 2011 el a bira bay patras. Sr. Maduro a bisa cu e ta kere cu un di e motibo cu turismo a cay, ta pa via de e prijsnan. Aruba ta un di e destino mas caro den Caribe desde tres aña pasa. “Nos por bisa cu nos no tin calidad di turismo mas, nos tin cantidad, pero no calidad”. Tin masha turista cu ta bin pa come, pa bebe, pa disfruta di e playanan, pero no pa uza e watersports.
El a comenta cu e prijs di e parasailing ta $60 pa persona, y el a sigura cu te ainda nan tin e prijs mas barata di e region. “Turismo ta consisti di temporadanan, y e temporadanan ta trece su hendenan”. No ta e mesun hende cu ta bin na Aruba tur e temporada, tin biaha cu ta existi hende cu ta ripiti, pero segun sr. Maduro ‘esey ta e hende cu tin hopi placa’.
El a duna di conoce cu den su trayectorio e no haya experiencianan malo, loke ta un tiki dificil ta loke nan mester haci como trahado di lama, pa via di e decisionnan cu a wordo tuma pa maneho di turismo. El a bisa cu e ta bay traha tur dia pa por mantene cu e turistanan. Sr. Maduro a bisa cu na e momentonan aki, pa un persona por mantene un compania di watersports ta costa hopi placa, e ekiponan ta costa, mantencion di ekipo tambe, ta yega un momento cu lo mester paga mas gasto cu e belasting mes, pero te ainda ta existi hende cu tin hopi aña trahando cu esaki y nan ta kere den dje.
Pa loke ta trata compania di watersports, mester sigura su negoshi, si no nan no por opera, un seguro ta hopi bon pa cualkier hende. “Bo no ta sali perdi nunca”, pero e seguro ta depende di e tipo di compania di watersports cu e persona tin. Sr. Maduro a splica cu e gasto mas grandi cu un compania di e tipo ey tin awendia, ta mantencion di e personal y gasolin.
Tocante e tema di e Parke Marino, el a expresa cu e no ta hopi contento cu e desaroyo aki, ya cu e ta significa algo hopi negativo pa e companianan di watersports, pa motibo cu den futuro e persona no por disfruta mas di e actividad cu nan ta ofrece, pa via di e Parke Marino. Sr. Maduro a bisa cu den turismo, ‘tur dia bo ta conoce algo nobo, bo por tin mal beis, pero manera bo yega lama, semper ta un turista cu ta drecha e dia pa bo’. Pa finalisa, el a bisa cu tur persona ‘mester cuida nos beachnan, mantene limpi y trata e turista bon’.
