Pandemia di Covid-19 ta uno unico rond mundo pa su efectonan den area economico, social, educativo y specialmente turistico, di e cual Aruba ta depende gran parti.

Asina a expresa Albert Maduro, ken desde 30 aña pasa ta traha cu compania di watersports. Ademas, el a expresa cu e lunanan aki cu e crisis a yega na Aruba, e situacion tabata hopi dificil. Turismo, riba cual nan ta depende, no tabat’ey.

“E situacion aki a siña mi, mi tin cu improvisa pa otro biaha esey no pasa”, Maduro a expresa.

Awor cu turistanan a cuminsa bin back, el a menciona cu e no tin duda di e turismo di Aruba. “Nos isla ta bendiciona, aunke nos mester ta cauteloso, pasobra bo no sa kico naturalesa tin pa nos. Y nos ta bendiciona pa e turistanan cu ta cla pa bin Aruba”, el a sigura.

Maduro a conta Bon Dia Aruba cu el a pasa diferente temporada na unda Aruba tabata hinca den situacionnan dificil. Por ehemplo, e caso di Natalee Holloway, horcan Lenny, 11 di september di 2001, den cual el a keda dos of tres siman sin trabou cu watersports; pero no tabatin un efecto asina grandi riba nan manera esun di aworaki.

“Aña 2008 tabata uno hopi bon pa nos, despues na 2009 nos a cuminsa sinti e caida y asina tur e añanan cu a bin despues”, el a manifesta.

Pa loke ta trata e efecto cu por bin pa loke ta keda di aña, el a sigura cu e no ta kere cu por haya otro efecto mas pa watersports si keda habri, pa motibo cu nan tin cu wak con nan ta domina e pruebanan cu a cuminsa haci di Covid-19 pa turistanan.

“Si esey cana bon, tur cos lo cana bon, pero e turismo e aña aki lo keda un tiki abou.” Pa motibo cu tur di nan ta trahando cuidadosamente, “no ta asina cu bo ta bay yena e luga cu bo no por controla e aglomeracion di hende. Tene na un manera cu bo por control’e y esey mi ta kere cu gobierno ta haciendo”, Maduro a destaca.

Pa e motibo aki, e ta kere cu e aña aki ta bay ta draai normal ainda. Pero ademas e ta kere cu otro aña prome cu zomer turismo lo optimalisa y turista lo keda bin.

Tambe el a trece dilanti cu ta existi hende cu ta bisa cu e seguro of e pruebanan pa Covid-19 ta hopi caro, pa lo cual el a bisa cu por ta, pero e ta kere cu hopi di nan ya mester cuminsa prepara caba pa scol y otro cosnan y asina nan por haci tur su gastonan. Famianan ta bin den temporada di zomer y esey ta costa nan un tiki mas cen.

Tocante su experiencia den e 30 aña den turismo, Maduro a bisa cu tempo cu el a cuminsa traha, no tabatin casi ningun hotel, sino e parti di campamento so. Na e momento cu el a cuminsa traha tabatin e construccion di hotel cu no a keda cla nunca, hunto cu e hotelnan y otro luganan. Awor por a mira con Aruba a crece den edificionan cu hotelnan halto, pero di parti di turismo, el a expresa cu comercialmente e turista a bay atras.

“Desde añanan 90 cosnan a bira mas caro y e volumen pa, por ehemplo, un watersport of un boto di pisca, a cay casi cu 35 pa 40% desde e momento ey te awor” , Maduro a señala.

E mesun companianan grandi cu tabatin 5 of 6 velero, awor nan ta usa un, kisas dos y pa e motibo ey hopi hende a diversifica y a bay den otro direccion, nan tin cu keda improvisa.

Ademas, el a menciona cu tambe ta existi hende cu ta bisa pa no haci watersports pa via di riesgo. “Pero di nos nan ta depende, anos ta un di nan cu tin e prome contacto cu e turista. Y mi ta kere cu den futuro e calidad di turista ta lanta back na nivel cu e tabata antes, mi no ta bay wak cu den futuro hopi compania di watersporst lo keda” Maduro a declara.

Ademas el a comenta cu turismo a bira cu nan tin cu traha dos of tres biaha mas duro compara cu antes, “pa asina bo por co-existi”. Pa finalisa, Maduro a comenta cu tur hende tin cu scucha y comporta nan mes den e crisis aki hunto cu e turista, pa motibo di e peliger cu Covid-19 ta representa. Esun cu ta traha directamente cu nan, papia cu nan y splica nan cu na Aruba nan ta haciendo e cosnan bon cu un tiki distancia. “E lo tuma tempo y pasenshi, e hende no mester tin miedo pasobra e situacion lo drecha back”, Maduro a bisa.