(AP) – Albania su Prome Minister a bisa diasabra cu e gobierno lo cera e plataforma di video TikTok pa un aña, culpando esaki pa incita violencia y bullying, specialmente entre muchanan.
Autoridadnan di Albania a tene 1,300 reunion cu docentenan y mayornan despues cu un hoben a staca y mata otro hoben despues di un discusion cu a cuminsa riba TikTok.
Prome Minister edi Rama, papiando na un reunion cu e mayornan y docentenan, a bisa cu tikTok lo “cera completamente pa tur hende. .. No lo tin TikTok den e republica di Albania,” Rama a bisa cu esaki lo cuminsa proximo aña.
E no a keda inmediatamente cla si TikTok tin un contacto na Albania.
TikTok den un respuesta diasabra a pidi pa “claridad urgente for di e gobierno di Albania” riba e caso di e hoben asesina. E compania a bisa cu e no a haya “evidencia cu e victima ni tampoco e sospechoso tabatin cuenta riba TikTok, y varios rapport a confirma cu videonan prome cu e incidente aki tabata publica riba otro plataforma, no TikTok.”
Muchanan di Albania ta e grupo mas grandi di usuario di TikTok den e pais, segun e investigadornan domestico.
Tin un preocupacion den aumento for di mayornan di Albania despues di rapport di muchanan cu ta coy cuchiu y otro obhetonan pa hiba scol y usa den discusion of casonan di bullying promovi pa e storianan cu nan ta mira riba TikTok.
TikTok su operacionnan na China, unda su compania mayor ta basa, ta diferente, “promoviendo con pa studia miho, con pa preserva naturalesa .. y demas cosnan positivo,” segun Rama.
Albania ta un pais demasiado chikito pa impone riba TikTok un cambio di algoritmo pa e no promove e “reproduccion di mensahenan di odio, violencia, bullying y demas,” Rama su oficina a skirbi na The Associated Press como contesta di e peticion pa comentario. Rama su oficina a bisa cu China su TikTok ta “preveni muchanan for di cay den e abismo.”
Autoridadnan a crea un serie di medidanan di proteccion na scolnan, cuminsando cu presencia aumenta di polis, programanan di training y cooperacion mas cerca cu e mayornan.
Rama a bisa cu Albania lo monitor con e compania y oro paisnan lo reacciona na e shutdown di un aña prome cu dicidi si lo permiti e compania sigui cu su operacionnan na Albania.
No tur hende ta di acuerdo cu Rama su decision di cera TikTok.
“E decision dictatorial di cera e plataforma di rednan social TikTok … ta un acto grave contra e libertad di expresion y democracia,” Ina Zhupa, un legislador di e partido Democratico den oposicion principal. “E ta un acto electoral puro y abuso di poder pa suprimi libertadnan.”
Albania tin eleccion parlamentario proximo aña.
