Mita dozijn di bayena franco di Nort Atlantico a fayece den ultimo luna, hibando cientificonan, oficialnan gubernamental y ambientalistanan na pidi pa un respuesta inmediato pa proteha e especie den peliger di extinsion.
Ta resta apenas tiki mas di 400 di e bayenanan aki. Tur seis di e bayena morto a wordo haya den e Golfo di St. Lawrence cerca di Canada, y sikiera tres di nan ta parce di a muri despues cu barco a dal den nan.
E mortonan a hiba cientificonan na bati alarma tocante e perdida potencialmente catastrofico pa e poblacion. E mortonan aki ta particularmente preocupante pasobra nan ta inclui bayena femenino, segun Philip Hamilton, cientifico cu e Centro Anderson Cabot pa Bida Marino na e aquarium di New England.
“Si tin di nan mester muri, no por ta e hembranan”, Hamiton a bisa, agregando cu e poblacion tin apenas 100 hembra reproductivo. “Nos mester un sistema diferente.”
E bayena franco a sufri un mortalidad halto y reproduccion disminui den añanan recien, particularmente 2017. E bayenanan tabata mustra di biaha den diferente areanan di ocean cu usual, pa motibo di disponibilidad di alimento, segun Nick Record, investigado senior na Bigelow Laboratory pa Ciencia Oceanico na Maine.
E cambio ey, vincula cu e keintamento di ocean, aparentemente a hiba e bayenanan pafo di zonanan protegi, y laga nan vulnerabel, el a bisa.
E bayena franco, conoci como ‘right whale’ wordo yama asina pasobra e tabata e bayena corecto pa caza durante e tempo di cazamento comercial, algo cu a hiba na decimacion di e poblacion. E poblacion no a recupera desde entonces.
Boks contra boto y keda pega den aparato di piscamento ta e dos menasa di mas grandi contra e bayenanan aki, segun agencianan protector.
Ta keda un restriccion di 10 nudo den e area unda e bayenanan a wordo mira, y ademas tin mas supervision den e golfo pa evalua e ubicacion di e bayenanan y sigura cumplimento cu e reglanan.
