Diamars durante conferencia di prensa Plataforma Politico E Forsa Nobo a anuncia Alan Howell como miembro di POR. Esaki a bin despues di varios combersacion, deliberacion y speculacion den comunidad, despues cu el a anuncia su retiro for di partido AVP y como consehero di Minister Mike de Meza.
Sr. Howell tabata “vote getter” di su stem districto durante ultimo eleccion cu riba 400 voto.
E ta aclaria su decision pa bay POR: “Mi a retira for di un partido y despues di a wordo acerca pa varios partido na Aruba, mi a dicidi di haci un encuesta y scucha mi hendenan y wak ki direccion nos bay aden. P’ami e ta importante pa tur hende compronde cu eleccion no tin di haber cu partido, sino cu pueblo, pueblo ta duna bo e mandato y no un partido”.
“Pa ta riba un lista no ta algo facil, bo mester tin e curashi, balentia y hopi amor pa bo pais pa bo por subi un lista y haci un diferencia”, sr. Howell ta continua. “Awe despues di scucha sostenedonan, famia, San Nicolas entre otro, nan a duna mi mandato cla y raspa di unda mi mester ta y caminda cu mi mester ta, ta caminda mi ta awe den Forsa Nobo.”
Lider di POR Otmar Oduber ta bisa: “E ta un honor pa mi por welcome Alan na e famia di e plataforma POR E Forsa Nobo. A base di su ideanan, vision y kico e kier logra den politica y con e kier logra esakinan cu e sosten di tur cu ta hunto cu ne, su bario y henter Aruba.
A yega na e conclusion cu definitivamente Alan como parti di e plataforma, POR lo contribui pa yega na e metanan cu e tin riba un interes personal pa loke ta trata Pais Aruba. Pero tambe cu el lo bira un parti integral di e filosofia y e programa cu ta trahando na e momentonan aki cu ta hopi importante pa su vision ta aden, pa logra na un oferta na comunidad di Aruba. Uno cu ta touch y yega den tur skina aki na Aruba.”
