Alan Howell a presenta dialuna durante tratamento di presupuesto supletorio den Parlamento un mocion den cual e ta pidi e mandatario di Asuntonan Social pa mas tarda 1 di februari 2021 trece cambio den e forma di pago di onderstand/bijstand. E peticion ta pa elimina e rijnan largo unda un multitud di hende mester para bou solo cayente of bou awasero pa por cobra nan placa di luna. Intencion ta pa haci e pago via transferencia bancario y asina facilita e proceso aki.

Howell a keda hopi contento y a gradici tur parlamentario, tanto di coalicion como di oposicion pa sostene e mocion aki na bienestar di nos hendenan humilde unanimamente y tambe Minister Glembert Croes cu a indica cu e ta sostent’e e mocion aki.

E mocion a wordo presenta durante prome disertacion di Alan Howell, durante cual el a bisa tambe cu ta trata ta di un presupuesto supletorio den un tempo unico, cual ta haci e reunion aki mas interesante y mas importante.

E ta bisa cu “cada 21 parlamentario mester reconoce esaki, full pueblo mester reconoce cu nos ta tratando aki den un situacion di un Covid, di un crisis mundial unda cada gobierno mester a uza nan sabiduria, inteligencia y bin cu ideanan creativo pa sali for di e situacion den cual nos ta aden”.

Den e mesun cuadro Howell a gradici Prome Minister y Gobierno en general pa haci hasta milager pa nos pais por a mantene cabes riba awa. E ta declara cu tin paisnan cu kier duna nos les, pero nan tin 8 pa 10 mil caso nobo di Covid-19 pa dia, mientras cu aki na Aruba nos tin un Minister Dangui Oduber cu a pesar di e criticanan a mantene e casonan hopi abou. “Nos a duna e di dos golf di Covid basta sla y segun mi nos tin’e cansa di tanto golpi cu nos ta dun’e, esaki cu ayudo di Dios, cual mi ta kere cu e ta Arubiano, pasobra e tin un man riba nos keto bay y casi casi nos por biba bek den un forma casi normal, a pesar di algun caso di hende cu no kier scucha”.

Bolbiendo riba e tema di presupuesto, Alan Howell a trece dilanti cu si e crisis mundial aki no a dal nos , nos lo tabatin un presupuesto historico di un surplus di 43,6 miyon, pero jammer genoeg nos a haya nos den un crisis y awe nos tin un deficit di 1.1 biyon.

Teniendo na cuenta e situacion aki, el a realisa un serie di pregunta na Prome Minister: Ki tempo nos ta bay keda cla pa loke ta e negociacion cu Hulanda? Pero cu un pakete cu no ta mina nos autonomia y cu nos tur por biba cun’e? Por splica un biaha mas pakico e articulo 4 no a wordo poni den e ley di biaha y no den toelichting?

Tambe el a pidi e prome mandatario un splicacion di e tankinan cu mester a wordo gehuur, mirando cu e interesadonan a hayal atras y si tin interesadonan na nan luga?

Siguientemente Alan Howell a pasa pa e cartera di Asuntonan Social. El a bisa cu esunnan cu mas a sinti e crisis ta e ciudadanonan cu a perde nan trabou y ta felicita Minister Glembert Croes cu ta yuda nos hendenan sobrevivi mas cu ta posibel cu tanto FASE y loonsubsidie.

Preguntanan cu el a haci Minister Croes ta: Cuanto persona a cobra FASE te awo? Cuanto persona a cobra loonsubsidie? Si ta berdad cu tin comerciantenan cu a haci mal uzo di e situacion?

Howell a gradici e mandatario pa por conta cu un oficina pa procesa onderstand na San Nicolas y ta spera cu por sigui cu e yudansa aki. Aki el a bisa cu varios persona a haci peticion pa onderstand, y ta puntra si tin un manera pa fast track peticionnan pa onderstand, specialmente den e tempo dificil aki?

Despues Howell a realisa algun pregunta na Minister Chris Romero: Con e inscripcion di spear fishing ta bayendo? Por a compronde cu tabatin un reaccion grandi pa cu esaki. A gradici Minister Andin Bikker cu a bin cu e idea pa hinca esaki den otro, tambe Minister Romero y gobierno henter cu a para tras di esaki.

Tambe a puntra con leu e proyecto di fast ferry ta bayendo?

Finalisando cu e prome parti di preguntanan, Alan Howell a puntra Minister di Husticia con e ta experiencia y lo pak aan e situacion pa evita cu agresion contra polis sigui tuma luga? Con Cuerpo Policial mes ta bay atende cu e situacion aki y ki mensahe lo bay manda pafo pa e cos aki no bira un custumber, pa e respet keda pa Cuerpo Policial y vice versa tambe?

Con e inscripcionnan pa opeliding ta bay y con e lesnan ta bayendo?

Con e trankilidad tan a e momentonan aki den brandweer? Por amplia riba e managenement team cu tin na e momentonan aki?