Parlamentario di POR, Alan Howell durante un encuentro cu prensa a comenta riba e firmamento di protocol cu a tuma diabierna ultimo entre Aruba y Hulanda. Na ocasion di e firmamento aki tabata presente Prome Minister, Minister di Asuntonan Social y e comandantenan van Beekhhuizen y Boots.
E protocol tin di haber cu formacion social y a firma pa e hobennan femenino tambe por forma parti di e trayecto aki. “Loke a yena mi persona cu orguyo y gran satisfaccion ta e echo cu dia 5 di april 2019 mi a entrega un mocion den nomber di Fraccion di POR relaciona cu e tema aki, esta di inclui e hobennan hende muhe den e formacion social tambe”, Howell a declara.
E parlamentario di POR ta agradecido cu na momento cu el a presenta e mocion aki den Parlamento, tur fraccion presente na e momento ey a brasa e idea aki y a vota na fabor di dje.
El a gradici gobierno pa tene cuenta cu e mocion cu el a presenta den cual e ta bisa cu considerando cu nos no por desmenti cu nos tin un Crisis Social; Cu ultimo añanan ta un echo cu hobennan femenino tambe tin hopi problema social cu ta afecta nan comportacion; Cu ta un echo cu ultimo añanan hopi bringamento publico na scolnan ta di hobennan femenino; Cu a reeinicia cu e programa di Formacion Social pa hobennan masculino; Cu tin hopi peticion den nos comunidad pa hobennan femenino por forma parti di e programa di Formacion Social; Cu e programa di Formacion Social ta yuda e hobennan cu ta participa den dje pa reincorpora nan mes positivamente den comunidad cu e posibilidad di haya un bon trabou. Ta dicidi: Di urgi gobierno pa studia profundamente e posibilidad pa mas lihe cu ta posibel laga e hobennan femenino forma parti tambe di e programa di Formacion Social y asina duna e hobennan aki e mesun oportunidad cu e hobennan masculino pa ta un miho ciudadano den nos comunidad y logra haya un bon trabou na beneficio di henter Aruba.
Alan Howell a probecha e ocasion pa gradici Hulanda, marinierskazerne y logicamente gobierno di Aruba tambe pa haci e mocion cu el a presenta na april 2019 un realidad, dunando asina nos hobennan femenino tambe un oportunidad pa reforma nan mes. Aki el a menciona cu ta varios hoben femenino a acerca su persona y puntra pakico nan no por tin e oportunidad di join e Formacion Social y wordo disciplina y poni bek riba e bon caminda pa port a miho ciudadanonan na Aruba.
El a encurasha e mayornan pa tuma contacto cu Sra. Ras cu ta dirigi esaki na Marinierskazerne pa wak e posibilidadnan pa inscribi e yiu muhe(nan) den e programa di Formacion Social.
Concluyendo, Howell a expresa cu ta asina aki Parlamento mester funciona, no ta importante cua fraccion a entrega un mocion, cu importante ta bienestar di nos Pais Aruba y na momento cu un mocion ta bon, ta importante pa tur fraccion para tras di e mocion aki y despues ta mas importante ainda pa gobierno honra e mocion.
