A traves di un comunicado di prensa, dianan pasa a bira conoci cu na Ministerio Publico a drenta un MOT melding (melding ongebruikelijke transactie) cu ta trata di algun iregularidad pa loke ta maneho di placa riba un cuenta bancario di un fundacion di fraccion di partido POR.

Pa cu esaki, nan a informa cu riba un ordo di Procurador General lo investiga mas leu door di Landsrecherche di Aruba y esey a hiba na un sospecho di malversacion di e fondonan. Mirando cu e placa riba e cuenta aki ta forma parti di fondonan publico, Ministerio Publico a dicidi di pone beslag riba algun cuenta cu te na e momentonan aki a aparece den investigacion.

Ayera den oranan di mainta, e lider di partido menciona, Alan Howell a ofrece un conferencia di prensa pa medionan di comunicacion local pa asina duna di conoce e otro banda di medaya pa loke ta trata e retiro di Gabinete Wever-Croes.

Cuminsando cu e frase “Mi ta bay laga pa cada ciudadano mes por evalua pa nan mes con e proceso a encamina pa gobierno cay y si tabata necesario”, el a menciona cu mirando cu Aruba ta pasando den tempo di crisis, ciudadanonan mes tin cu evalua si e situacion aki tabata pa laga Aruba sin un gobierno.

Howell a laga sa cu siman pasa el a haya un carta di Landsrecherche na unda ta splica cu nan ta bay haci un investigacion riba e fondonan di e fraccion, y tambe a pone beslag riba un cuenta cu el a sigura cu ta personal.

El a declara cu den e carta no ta skirbi detayenan di kico e caso ta trata ni e motibonan. El a afirma cu como polis e sa masha bon cu ta posibel cu por tuma algo den beslag sin necesariamente mester tin un verdachte tambe riba dje, “aunke pa mi e tabata un shock grandi pa haya mi den situacion aki”, Howell a expresa.

Di mesun forma el a continua afirmando cu e no sa di kico e caso aki ta trata. Diferente medionan di comunicacion a trece dilanti informacion cu segun e mes no ta na haltura di dje. Sino cu el a haya yamada di su sostenedonan indicando cu den un comunicado di Ministerio Publico cu a wordo publica den prensa, eynan a splica kico ta sucediendo cu su persona specificamente.

“Ora m’a mira e comunicado di Ministerio Publico tabata bastante diferente cu e carta cu mi mesun persona a haya”, el a comenta.

Igualmente, el a confirma cu el a haya un yamada di prome minister Evelyn Wever-Croes y minister di Husticia Andin Bikker, durante cual el a contesta cu e no por bisa hopi, pa motibo cu e carta no ta bisa detayenan.

Minuutnan despues el a wordo informa cu gobierno a cay, segun el a expresa, pero el a bisa cu e no ta kere cu gobierno a cay pa via di dje. “Con ta posibel un gobierno por cay den fraccion di minuutnan asina ey?”

Howell a declara cu e tambe ta un lider di un partido di coalicion. E no ta compronde con ta posibel cu nan no a yama pa un reunion urgente cu e tres lider di coalicion, pa asina splica kico ta pasando of puntra pa cua motibo. E mes a menciona cu e no a haya e oportunidad pa mustra y prueba su inocencia.

Mirando cu Aruba ya caba a drenta den temporada di campaña, Howell a manifesta cu e sa cu minister presidente kier a laga e gobierno cay, pero cu e no ta considera husto pa mal usa un momento pa tira e gobierno abao riba nomber di Alan Howell, pa asina por laga gobierno cay y laga e pais sin un gobierno legitimo.

“Duna mi un oportunidad pa mi por proba mi mes y splica mi mes”, Howell a afirma.

Ademas, el a trece dilanti cu e tabata trahando un lista caba pa eleccion di e aña aki sin minister Bikker y sin e parlamentario Dellanire Maduro – kendenan a distancia di e partido aki – pa motibo cu for di algun tempo caba nan a laga Howell sa cu nan no tin interes di forma parti di partido POR mas, y cu nan no lo bay eleccion cu e partido aki.

E ta considera cu e ‘move’ aki di distancia nan mes di e partido door di e carta di Ministerio Publico ta un show y ademas a comenta cu tin rumornan cu ta bisa cu nan lo forma parti di partido MEP den eleccionnan binidero.

Howell a afirma cu e hunto cu su abogadonan ta preparando nan mes pa loke tin di haci cu loke a wordo publica den otro medionan y cu tin di haci cu e placa di fraccion. Di esaki el a confirma cu “kisas door cu mi a haci cierto transaccion y depende con grandi e suma ta, MOT por a haci un melding y por lanta un red flag, esey ta masha normal”.

El a declara cu si e tabata un persona cu kier a malversa placa di pueblo, e por bay cerca su yiu na Hulanda tur luna. “Nunca en mi bida mi haci uso di e carchi pa e cosnan ey, nan por coba na unda cu nan kier cu nan no ta haya ni un caminda cu Howell a malusa e carchi”, el a aclaria.

Di mesun forma, el a sigura cu e ta hayando sosten pa e por bay den campaña pa eleccionn proximo luna di juni. “Mi ta capaz di bay riba lista mi so, anto mi ta bay pidi e mandato di mi hendenan di pabao di brug y muy specialmente di hende di pariba di brug pa logra un asiento”, Howell a expresa.

Aworaki nan ta bezig cu candidatonan nobo, y el a afirma cu nan ta haciendo e screening pa nan por participa den eleccionnan, pa e partido por tin su lista cla den proximo dianan. Y segun el a manifesta, tur cos ta sigui normal pa motibo cu e no a wordo apunta como sospechoso den e caso. El a afirma cu partido POR ta bay participa den eleccion den e aña aki.

Como contexto di e asunto na man di OM, door di un areglo cu ta existi pa varios aña caba, tur partido ta haya 10 mil florin pa luna pa cada parlamentario cu nan tin. Aworaki a traves di e caso aki por haya sa cu comunidad pa cada parlamentario di tur partido ta paga 10 mil florin pa luna y cu e cifra aki no tin di haci cu nan salario y tampoco cu e persona emplea pa yuda e fraccion.

Bon Dia Aruba a puntra si ta berdad cu algun candidato di POR a haya 10 mil florin cada un, pakico e placa ta supone di ta, y tambe si nan mester entrega un cuenta anual unda ta splica con a usa e placa aki. El a contesta cu cualkier placa cu nan a haya mester trece e recibo pa prueba unda e la bay.