Diahuebs mainta den parlamento Alan Howell, lider di partido POR, a duna su discurso di despedida. Durante su discurso Howell a gradici pa e oportunidad cu el a ricibi pa forma parti di parlamento di Aruba number 10, pero tambe el a duna un declaracion y a defende su mes, pa locual ta trata e caso hudicial cu tin pendiente contra dje.

“Mi ta sumamente orguyoso, satisfecho, contento, cu no solamente mi a forma parti di parlamento number 10, pero tambe mi a haya e gran honor di por a asumi diferente rolnan den e parlamento aki”, Howell a bisa.

“E ta un honor pa bo ta un di e personanan cu por sinta den un di e 21 stoelnan aki den representando full bo pais Aruba, pa por aproba leynan, pa por bin cu mocionnan na bienestar di nos dushi pais Aruba”, Howell a bisa. “Mi ta hopi gradicido cu mi a haya tambe mayoria di e mocionnan cu mi a presenta na bienestar di nos pais Aruba, mi a haya sosten completo di Parlamento”.

Howell a describi su experiencia den parlamento como uno inolvidabel cu tabata tin su parti bon y su parti malo. Y na parti malo el a referi na locual ta trata e caso cu tin den su contra na Ministerio Publico.

“Experiencianan menos agradable cu mi a pasa aden tabata na momento cu mi haya mi confronta cu un asina yama caso penal cu mi mester a haya mi ta defende mi curpa, y mi ta gradici Dios cu na momento cu esaki a presenta, danki Dios na mi integridad cu mi tin cu mi por a proba y demostra cu nada robez no a tuma lugar,” Howell a bisa.

El a bisa tambe cu el a haci entrega di su documentonan administrativo na Ministerio Publico di un manera voluntario “pa nan por a mira cu no tin nada straño y nada robez y sigur sigur ningun debchi a bay den mi saco of un caminda cu no mester tabata”.

“Mi ta kere kisas hasta, despues di habri e parti administrativo aki, nos ta bay termina como fraccion, unda ta bay debolbe casi 100 mil florin na finanzas, kiermen sigur sigur por demostra cu no a malgasta placa di pueblo,” Howell a bisa.

Howell a sigura tambe cu por demostra cu na ningun momento, e fraccion di partido POR en general, cu “ningun dia lo bo por mira cu a bay sinta come den un restaurant of a bay biaha cu e placa di fraccion cu nos ta haya”.

“Mi ta kere esakinan ta caminda cu toch, tardi of trempan lo por demostra e parti integro, con nos a bin ta maneha cu e placa di pueblo. Y sigur sigur pa termina, pa esunnan cu gusta e palabra voorschot, Alan Howell no a tuma voorschot ningun dia”, Howell a bisa. “Al contrario, Alan Howell a paga cosnan delanta pa gobierno pasobra na momento cu partido POR a drenta den gobierno, partido POR no tabata recibiendo e placa di fraccion,” el a agrega.

Por ultimo Howell a gradici miembronan di oposicion y coleganan di coalicion pa tin respet di no atak’e na momento cu e acusacionnan a bin dilanti.

Bon Dia Aruba a contacta señora Ann Angela, vocero di Ministerio Publico, pa comentario ariba e caso contra Howell, y señora Angela a bisa cu e caso di Howell ta habri ainda y no a keda ‘geseponeerd’.