Dia 30 di maart comunidad di Aruba a conoce cu gobierno di Gabinete Wever-Croes a entrega su retiro pa motibo di ‘Integridad’ y cu nan no por sigui goberna cu un persona cu ta sospechoso pa husticia segun loke prome minister a declara.

E dia ey Ministerio Publico den un comunicado a informa cu nan a cuminsa un investigacion penal na unda lider di partido POR Alan Howell ta envolvi den supuesto malversacion di fondonan publico.

Ayera mainta, Howell a ofrece un conferencia di prensa dilanti di Imsan na San Nicolas pa trece dilanti noticianan cu ta positivo pa pueblo segun el a sigura y cu awor San Nicolas por conta cu un centro medico cu a bira hospital dedica na area di San Nicolas y cu por trece un reactivacion economico den area aki.

Di otro banda, Bon Dia Aruba kier a haci algun preguntanan importante tocante integridad na Alan Howell mirando cu e ta un persona cu ta bin for di Cuerpo Policial cu ta un departamento hopi importante y esencial pa pais Aruba cu ta promove ‘Servicio, Integridad y Siguridad’.

Den dianan aki a keda conoci varios detencion cu tin di haber cu e caso penal yama ‘Avestruz’ na unda Benny Sevinger di partido AVP ta e sospechoso principal pero tambe ta e caso ‘Flamingo’ cu e sospechoso principal ta ex-minister y ex-lider politico di partido POR Otmar Oduber.

Pa cu esaki, Bon Dia Aruba a puntra Howell na prome instante kico su persona ta pensa di integridad den partidonan politico, pero no por a haya un contesta precies y concreto, el a bisa “mi no ta bay contesta e pregunta aworaki, awe nos a bin specificamente pa amplia y papia riba e tema di Imsan, cu mi ta kere cu esaki ta un gran logro y mi ta kere awe mi kier a focus echt riba e logro grandi cu Imsan ta duna nos pueblo y den otro ocasion lo mi por contesta cualkier otro pregunta”.

Ademas di esey, Bon Dia Aruba tabatin un otro pregunta: Mirando tur e detencionnan den caso Avestruz, meneer Howell ta pensa cu ta integro cu partido AVP laga un ex-minister cu ta sospechoso principal participa den eleccion? Na unda el a enfatisa cu tampoco e lo duna un comentario riba e caso Avestruz.

Di tres pregunta cu Bon Dia kier a trece dilanti tabatin di haber cu su participacion den proximo eleccionnan, Howell a confirma pa prensa dianan pasa cu tin un investigacion penal contra su persona y hasta a bisa cu e lo laga e investigacion cana su caminda, e pregunta tabata: “bo por bolbe confirma na nos cu sr Howell lo participa den eleccionnan aki como lider di partido POR y sospechoso penal? El a contesta efectivamente cu si e lo participa.

Ta importante pa destaca cu dia 10 di maart un otro medio di comunicacion a publica un articulo di Howell na unda tabatin como titulo “Si tin un ex-minister bao di investigacion e tin cu carga su responsabilidad y esey ta los di partido POR”.

Ademas el a usa e famoso dicho di ex-prome minister di Aruba Nelson Orlando Oduber cu ta bisa: “Esun cu kima tin cu sinta riba su blaar” y na mesun momento el a declara cu “Alan Howell y partido POR no por bay carga cruz pa ningun otro hende cu por a comete cualkier fechoria”.

Den articulo aki, a destaca un frase cu Howell a trece dilanti na unda el a expresa cu “Si den e partido cu mi ta lidera tin un persona cu ta bao di cualkier investigacion, e persona ta bay sinta patras un rato y na momento cu e investigacion mustra cu e ta inocente bo ta bonbini bek den cualkier posicion”.

Mirando e declaracion aki di Howell, Bon Dia Aruba tambe kier a puntra si e ta un persona cu ta para firme tras di su mesun palabranan citando e frase menciona caba na unda nos kier a haya confirmacion si e lo sigui participa den eleccionnan of lo entrega su retiro y ‘sinta na banda un rato’ manera el a sigura den e articulo pero, tampoco por a haya un contesta aunke despues di conferencia di prensa e mesun preguntanan aki a wordo haci via telefon ya cu Howell no kier a contesta publicamente pero un biaha mas el a responde “mi no tin contesta pa e preguntanan aki al momento”.