Caso penal denomina pa Ministerio Publico como ‘Diamanta’ a cuminsa na september di 2021, ora Landsrecherche a haci un entrada hudicial na cas di un periodista conoci na Papayastraat. Ayera el a caba cu e sentencia dicta na e sospechoso principal, esta Alvin (Alan) Howell, ken tabata fungi como ex-vicepresidente di Parlamento di Aruba y ken tambe a apela e decision aki.

Ayera 24 di maart a bira conoci e sentencia di e caso na unda a condena Howell cu dos aña di prison mas un multa di 35.000 florin. Den e caso aki hues a haya cu a malversa fondo (195.404 florin) y tambe a falsifica documento.

Howell tabata representante di e partido politico Hunto Nos POR na Parlamento di Aruba. E partido aki a ricibi door di ‘Regeling ondersteuning fracties’ contribucionnan financiero pa e funcionamento optimal de su fraccion. Pais Aruba transferi e fondonan aki na e fundacion di Hunto Nos POR cu tabatin e obhetivo di “apoya e fraccion di POR, promove y mantene e funcionamento optimal di e fraccion.” E fundacion tabatin dos director, Howell y Jacqueline van Putten ken tabata tesorero, segun loke e sentencia ta indica.

Cantidad substancial di placa di e fundacion a ser paga na Fondo Advisory – pero a resulta cu e compania aki no ta existi y no por haya nada di esaki na Departamento di Impuesto – manera e website NoticiaCla a reporta. E website tambe a indica cu difunto tata di Howell tabata tras di Fondo Advisory, y no un hurista manera tabata indica den documentonan. Ademas segun fiscal no a haya ningun factura. Tampoco a haya factura pa confirma declaracion di Howell, cu tabata paga su tata como consehero, mas bien, segun fiscal, a traha factura di pago despues di fayecimento di tata di Howell.

Den esaki tambe tabata envolvi un medio di comunicacion local “E Arubiano” cu awor ta EA-News, cual a haya un suma di placa pa haci trabaonan pa partido POR.

Di loke ta trata Blue is Love Foundation, den su declaracion Howell a afirma cu el a transferi un suma di 18.000 florin e dia 21 di september di 2020 y despues e mes a afirma cu no a bisa na ken precisamente a entrega e suma di placa aki.

Recibo y factura cu no a paga directamente di e fundacion a keda transferi na e cuenta bancario di Howell of a wordo retira pa Van Putten.

Sinembargo, Howell a señala cu despues cu el a ricibi e fondonan el a paga nan back cu placa cash. Tambe Howell a afirma cu e mes a keda cu e fondonan debi cu anteriormente el a paga na e companianan aki cu su mesun fondonan, por lo tanto, e fundacion mester a dun’e su placa back.

Fiscal di Ministerio Publico a indica cu esaki no ta legal ya cu a utilisa facturanan falso pa trabaonan realisa.

Howell a apela e decision aki mesora y mientras e caso ta sigui su caminda, e ta bay keda den libertad.

Di su parti, Van Putten tambe a wordo condena pa malversacion cu 120 ora di trabao comunitario y un multa di 1.000 florin.

Manera ta conoci, e acusacionnan di mal uso di fondonan pa e fraccion di POR a bira motibo pakico a baha e gobierno anterior di Gabinete Wever-Croes I di manera prematuro.