Ayera mainta, fraccion di partido POR a ofrece nan prome conferencia di prensa di aña 2021, pa di e manera aki trece informacion pa comunidad di loke ta trata retonan cu pais Aruba ta enfrentando cu e pandemia coronavirus, ademas di e situacion cu Colegio San Nicolas ta pasando na e momentonan aki.

Dellanire Maduro, lider di e fraccion, a splica cu su persona a entrega un peticion na presidente di parlamento, Juan ‘Ady’ Thijsen pa nan por haya minister presidente Evelyn Wever-Croes, minister di Salud Dangui Oduber y Crisis Team pa asina nan por trece dilanti e desaroyonan, no solamente riba e casonan di Covid-19 cu a aumenta, sino cu tambe riba e plan di vacunacion: Di ki manera esaki lo wordo haci, ki pasonan nan lo tuma, ki personanan ta bin na remarca, entre otro. El a comenta cu nan a haya informacion di mas o menos con esaki lo tuma luga. Ta conoci cu personal cu ta traha den sector di cuido ta esunnan cu lo haya e vacuna prome, despues hende grandi cu tin enfermedadnan cronico; pero “na mi parecer ta importante tambe pa vacuna esunnan cu ta menor di 60 aña cu ta sufri di diabetes, ta sufri di presion halto of enfermedadnan respiratorio, nan tambe ta importante”.

Maduro a destaca cu esaki ta importante pa motibo cu e cantidad di vacuna cu pais Aruba lo haya te ainda no ta conoci na parlamento, y manera el a splica, e grupo bao 60 aña cu ta sufri di enfermedadnan ta esunnan cu ta drenta den unidad di cuido intensivo (ICU). “Y esaki ta loke nos tur kier preveni, y ta gastonan extra. Aunke tin retonan financiero cu a wordo corta pa loke ta e budget di salubridad, pero ta importante e riesgo y consecuencia cu a largo plaso e salud di e persona aki ta biba cune y ta sobrevivi pa lo cual ta e enfermedad aki”, Maduro a expresa.

Den un otro topico, el a bin dilanti cu e condicionnan cu Hulanda a pone pa Aruba den cortamento di cinco miyon florin pa luna den AZV. Di esaki, el a comenta cu mester hacie di un forma diligente, pa motibo cu ainda pa nan no tin un claridad di con precies e rekening di cinco miyon a wordo haci. Mirando cu esaki ta sumamente doloroso pa comunidad y pa dunadonan di cuido cu cada dia ta pone den riesgo nan bida pa combati e virus Covid-19.

Como presidente di comision di Salubridad di parlamento, Maduro a indica cu aña pasa nan a invita na e momento ey e ex-director di AZV, na unda el a splica loke ta e Five Model di corta y reduci pa por cumpli cu exigencianan di Hulanda. El a sigura cu el a haci un apelacion pa por bin cu un plan B con por corta den sector aki, incluyendo tur e pensamento y ideanan di tur dunadonan di cuido, pa por yega na algo cu ta duradero y cu no ta bay haci impacto pa area di cuido cu mester brinda na tur ciudadano.

Di loke ta trata accion cu a tuma luga ayera na Hospital di parti di sindicato y algun verpleegster, nan como parlamento tambe kier mira con esaki ta sigui desaroya, con e dialogo a bay cu e bishita di secretario di Estado Raymond Knops pa lo cual ta e detayenan di e landspakket y con Aruba tin cu sigui contribui na e recorte aki.

Di su parti, Alan Howell, parlamentario cu tambe ta forma parti di e fraccion di e partido aki, a menciona cu den area di enseñansa desde dialuna ultimo na Colegio San Nicolas ta tumando luga diferente accion. Y minister di Enseñansa Armando Rudy Lampe a ofrece un conferencia di prensa, cu den opinion di docentenan di e scol aki, nan no a keda conforme cu e ponencia cu Lampe a trece dilanti.

Tambe el a señala cu studiantenan a sali pa sostene nan den nan parti di nan version. Esaki ta un situacion fastioso segun loke Howell a sigura, “como parlamentario esaki ta un situacion dificil pa mi mes por bisa ken ta esun cu tin rason of no”.

Asina mes, el a expresa cu “minister di Enseñansa mester bay parlamento pa responsabilisa su mes pa loke e ta kere aden of loke e ta kere cu e ta bin ta haya.” Pa e motibo aki Howell a afirma cu debi na e situacion aki, docentenan a laga sa cu nan no ta bay duna les te ora cu minister Lampe trece su claridad of pruebanan dilanti; pero cu na final di dia esunnan cu ta sali perhudica ta e muchanan.

Na momento cu nan ta haya documentonan precies, como e rapport cu a wordo traha di Colegio San Nicolas, na parlamento por duna un comentario corecto riba esaki, segun loke Howell a sigura.

Ademas, el a afirma cu pa tur e turbulencia cu sector enseñansa tin na e momentonan aki, nan como fraccion di partido POR no ta wak como factor si ta sostene minister Lampe of no. E factor ta trata cu ora ta eherce e funcion di parlamentario, nan ta busca tur forma pa trece trankilidad, caminda na unda e docentenan tabatin su ponencia y na unda el a para como parlamentario tras di nan varios biaha.

Pa finalisa, a puntra si e ta haya minister Lampe apto pa sigui maneha e cartera. Howell a afirma cu den ultimo lunanan aki a mira cu tin ‘turbulencia’ den enseñansa, pero ta keda pa nan como parlamento pa bolbe trece paz den enseñansa.