Ningun momento a spera di un Parlamentario kibra e propio regla di Comision Fiho di Parlamento y manda un declaracion publico. Asina a declara Norman Kuiperi di Directiva di Fundacion Parke Nacional Aruba, FPNA. “Un reunion den Comision Fiho ta uno secreto y a duna nos e confianza di por a papia habri, sin preocupacion cu por saca informacion afo,” Kuiperi a bisa.

FPNA tabata invita pa duna un presentacion na Comision Fiho di Medio Ambiente y Infrastructura di Parlamento. Esaki den luz di e caso cu e organisacion di ATV/UTV a lanta contra e decision di FPNA pa limita e cantidad di tour y vehiculonan aki den su teritorio. E comision di Parlamento a invita e organisacion Aruba Offroad Foundation y kier a tende e banda di FPNA. Y ningun momento e tabata pa yega na un palabracion cu e organisacion.

E enfoke di e presentacion cu mester a dura un ora, tabata riba e ley cu ta dirigi FPNA y e responsabilidad cu tin pa proteha e areanan natural cu ta cay bou Parke Nacional Arikok, Parke Marino Aruba, Spaans Lagoen y e otro terenonan asigna como protegi.

Norman Kuiperi a bisa cu no por bay den e contenido di e reunion, pero e tabata sumamente orguyoso con e team encarga cu maneho diario di e parkenan a splica henter e ley, e trabou cu ta haciendo, e motibo di decisionnan. “Nos a bay pa un ora, pero tabatin asina hopi pregunta cu e reunion a dura mas di tres ora.” A presenta potret , resultado di investigacion pa saca tur duda di e destruccion cu a tuma luga den parke. “Nos a haya bon pregunta di Parlamentarionan y nos a intercambia informacion, cu ta proposito di e Comision Fiho. E no ta pa convence otro di algo.”

P’esey mes a keda hopi sorprendi cu miembro di fraccion di POR, Alan Howell ta duna un declaracion na media cu FPNA ta bay sinta na mesa cu Aruba Offroad Foundation. “Nos a sinti nos mes hopi comodo pa por duna nos presentacion. Mester sinti liber sin ta menasa pa duna informacion durante e reunion asina. FPNA a ilustra cua ta e tratadonan cu mester tene cuenta cu ne, y cu no por desvia di dje.”

FPNA a sali di e reunion cu satisfaccion pa e trabou haci na informa e miembronan di e comision di e responsabilidad legal pa cuida e area. Y e informacion di e siguiente dia cu lo a yega na un acuerdo pa sinta na mesa cu e fundacion Offroad Aruba como tal a cay manera un baño di awa friu. “Ningun momento so esey tabata e proposito di e reunion. Pio ainda, nos no ta bay sinta cu un organisacion cu nos tabata negociando cune y ta pasa porta patras y entama un caso contra nos.”

Mientrastanto FPNA ta preparando pa e caso sumario cu e fundacion Aruba Offroad a entama cu ta programa pa Diabierna awor. Norman Kuiperi y directiva di FPNA ta sinti nan mes hopi fuerte den nan posicion, pa motibo cu e maneho determina no a cay for di cielo. Ta basa riba ley y tambe estudionan efectua pa midi impacto di e uzo excesivo di ATV/UTV den Parke Nacional Arikok.

Pa loke ta e accion di Alan Howell, Kuiperi ta seriamente considera pa prome cu e caso, formalmente entrega carta di protesta pa su actuacion na Presidente di Parlamento.