Mediante un sentencia di dia 15 di januari di e aña aki, a bira conoci cu ex-miembro di Parlamento di Aruba, Alan Howell a gana su caso civil contra Gobierno di Aruba. E caso tabata pa motibo cu gobierno a stop su salario debi na diferente argumento cu a presenta contra Howell.

Den e Landsbesluit di 3 di october 2022 number 8 cu a ser rechasa, Gobierno di Aruba a dicidi pa suspende Alan Howell for di 4 di october 2022, segun articulo 87, sub a, di ley di Lma (Landsverordening materieel ambtenarenrecht), te ora un decision riba castigo disciplinario tuma luga. Tambe, Gobierno a dicidi pa retene salario di Howell for di 4 di october 2022 pa un periodo di seis siman cu un tercer parti, y despues di seis siman, retene e salario completo te ora un decision riba castigo disciplinario tuma luga. Contra e landsbesluit impugna, Howell a haci obhecion na corte riba 26 di october 2022.

Hechonan

Alan Howell tabata funcionario di Cuerpo Policial di Aruba y tambe tabata miembro di Parlamento di Aruba for di 17 di november te cu 7 di juli 2021.

Prome cu 7 di juli 2021, un investigacion penal a cuminsa contra Howell relaciona cu delitonan presuntamente cometi pa su persona durante e tempo cu e tabata miembro di parlamento.

Mediante un decreto nacional di 14 di september 2021, Gobierno di Aruba a dicidi di suspende Howell di su funcion, tambe a dicidi cu e suspension mester a dura te dia cu autoridad competente lo a dicidi e sancion disciplinario.

Mediante un e-mail di dia 2 di augustus 2022, Ministerio Publico a informa DRH tratamento di caso penal di Howell ta wordo trata 1 di September 2022.

A traves di e decreto nacional, Gobierno di Aruba a dicidi di suspende Howell for di 4 di october 2022, nan a argumenta cu a presenta kehonan penal contra su persona, igualmente nan a dicidi retene un parti di su salario durante seis siman y despues di e seis siman nan a kit’e totalmente, tanten tabatin un decision riba e sancion disciplinario.

Mediante un sentencia di dia 12 di december 2022, Corte a suspende e decreto nacional rechasando e medida di retencion di salario di Howell, Gobierno di Aruba a basa su decision den lo siguiente: cu personanan cita pa entre otro, malversacion di fondonan comunitario y participacion den un red delictivo;

Cu e persona afecta no por bay back den su funcion como funcionario policial, debi na e gravedad di e hechonan, e impacto social grandi cu Howell a causa cu su conducta di politico, a afecta e confiansa cu ciudadanonan mester por duna na Cuerpo Policial y e conducta ehemplar di e funcionario policial.

Cu e casa di Howell ta sigui dirigi un compania di rij scol y un compania di siguridad, loke ta laga na Howell otro posibilidadnan di entrada.

Cu interes di Gobierno den caso aki ta prevalece riba interes di Howell bay su trabou back como funcionario policial, ya cu un funcionario publico tin un funcion ehemplar y cu e retencion di su salario ta hustifica debi na e impacto grandi di e actonan cu Howell a comete, daño na reputacion y gravedad di no cumplimento di e deber y e lucha dificil di Aruba contra fraude y corupcion.

Di su parti, Howell a nenga di ta culpabel di no a cumpli algun di su obligacionnan, el a señala cu e decision a ser adopta di forma negligente, ya cu Howell no a spera e proceso penal. Tampoco ta existi interes pa retene su salario. Cu Howell ta e persona cu ta sostene su famia y cu e rijschool y compania di siguridad di su casa no ta genera entrada suficiente, segun loke Howell mes a sigura.

Marco huridico

Segun e Landsverordening voorzieningen gewezen politieke ambtsdragers en hun nabestaanden (AB 2010 no.91) (Lvgpan) den su articulo 2 inciso 1, un persona cu tabata funcionario publico prome cu lo a ocupa un funcion politico y cu no a eherce su funcion como polis debi na su posicion politico mester, e dia despues di su retiro como politico automaticamente ta bek den su funcion como funcionario publico.

Segun articulo 4 di Lvgpan, pa evita un disminucion inespera y inhustifica di su salario, e funcion politico anterior tin derecho, den circunstancianan determina, un asignacion di transicion durante un aña, despues di su retiro. E asignacion aki ta paga pa luna hasta 80% di loke e tabata ricibi den su funcion politico. Di esaki, ta bay kita entrada cu e persona por haya den su actividad como profesional.

Segun articulo 82, inciso 1 di Lma, e funcionario cu no lo cumpli cu su obligacionnan imponi of lo ta culpabel di negligencia den cumplimento di su debernan por ta obheto di sancion disciplinario di parti di e autoridad competente. Di acuerdo cu e inciso 2, e no cumplimento di su deber ta inclui e violacion di cualkier norma of abstene su mes di no haci loke un bon funcionario mester haci.

Segun articulo 87 y 82 di Lma, un funcionario por ser suspendi di su funcionnan pa autoridad competente si ta presenta cargonan penal contra su persona pa mal comportamento.

Evaluacion

E orden di suspension cu ta basa den articulo 87 (1) (a) di Lma. Ta referi na e autoridad di un organo administrativo di suspende un funcionario publico pa causa di un acusacion penal. Den caso aki, Howell ta procesa penalmente, entre otro cos, pa malversacion di fondonan publico, falsificacion y participacion den un organisacion criminal pa comete malversacion di fondonan . Debi na e gravedad di e actonan pa lo cual Howell ta sospecha di ta responsabel y e repercusion social di su comportamento, corte ta considera cu Howell tabatin derecho di haci uso di su autoridad.

E retencion di un parti di su salario ta basa den e inciso 1, articulo 89 di Lma, den articulo aki ta indica cu durante e suspension pa loke ta trata un proceso penal pa un falta di e funcionario publico, ta retene un parti di su salario.

E retencion total di e salario di Howell tambe ta basa den articulo 89, inciso 1, di Lma cu ta trata di e facultad di un organo administrativo pa retene e total di entrada. E cuestion ta si Gobierno di Aruba por a yega rasonablemente na e facultad ey. Den esaki, Corte a considera cu den e documentonan y di loke por a mira no tabatin un bista cla cu Gobierno di Aruba a investiga e situacion financiero real di Howell prome cu a kita su salario totalmente. Por ehemplo, den nan investigacion riba opcion alternativo di entrada, Gobierno di Aruba a tene na cuenta cu Howell su casa ta doño di un rijschool y di un compania di siguridad, pero nan no a inclui e entrada di e companianan aki y nan obligacionnan financiero concreto manera hipoteca, debenan,entre otro.

Pa e motibo aki, e decreto nacional rechasa no por keda manteni den e parti aki y ta bay keda anula. Den consecuencia, ta bay retene un tercio di entrada di Howell incluso despues di seis siman. Corte no ta wak ni un motibo pa paga e parti reteni di salario na otro persona cu no ta Howell, manera el a solicita.

Decision

Hues di corte a declara e obhecion valido pa loke ta dirigi contra e decision di Gobierno di Aruba bao number III di e decreto nacional rechasa cu entrada ta keda reteni despues di seis siman tanten autoridad competente lo adopta un decision riba e sancion disciplinario.

Ta declara sin efecto e decreto nacional.