Al menos dies especie di tribon asocia cu rif den Hulanda Caribense

Investigacion Marino Wageningen a reporta dies especie di tribon asocia cu rif den Hulanda Caribense den un estudio recien publica como parti di proyecto ‘Save Our Sharks’ di DCNA.

E especienan mas comun ta e nurse shark y e Caribbean reef shark. Generalmente, a observa mayoria di e tribonnan den areanan di conservacion y no den areanan sin proteccion, resaltando e importancia di e zonanan aki pa conservacion di tribon.

Mas di 100 miyon tribon ta wordo mata tur aña como resultado di piscamento y actividadnan di ‘finning’ di tribon (kita su aleta), dobel e ritmo den cual nan por reproduci. E demanda pa aleta di tribon y otro productonan di tribon a pusha un cantidad di especie cerca di extincion. Tribon ta particularmente vulnerabel pa sobre-piscamento y degradacion di habitat ya cu nan ta madura laat y ta produci tiki cria. E menasanan principal pa tribon den nos awanan ta piscamento accidental, degradacion di habitat, y riesgo di e desaroyo di mercado di aleta, cu lo conduci na piscamento enfoca riba tribon.

Nos mester ocean saludabel, y ocean saludabel mester di tribon.
Tribon ta tene nos ocean saludabel. E predadornan top aki ta elimina miembronan enfermo of debil di poblacionnan di nan presa. Un reduccion den cantidad di tribon ta conduci na disturbio den e balans natural di lama. Esaki por afecta e poblacion general di pisca, y bon stock di pisca no ta solamente importante pa piscadonan cu ta depende riba piscamento, sino tambe pa turismo y comunidad local.

Tribon ta un di e especienan menos aprecia. Pa varios generacion, tribon tabatin un mal reputacion no mereci. Hende ta parce di mira nan como animalnan teribel cu ta presenta un peliger pa tur loke ta landa den ocean, incluyendo humano. Pero awo nos sa cu esaki ta leu di berdad, e creaturanan magnifico aki ta esencial pa ocean saludabel y e riesgo pa humanonan ta chikito.

Proyecto ‘Save Our Sharks’ di DCNA

Falta conocemento tocante e distribucion y abundancia di tribon y especienan di raya den Hulanda Caribense. Pa combati e falta di conocemento aki, entre 2015-2018 DCNA a tene e proyecto SOS, ‘Save Our Sharks’ pa Hulanda Caribense, funda pa Postcode Lotterij Hulandes. Den e proyecto aki, DCNA a colabora cu piscadonan local y cientificonan y tabatin como meta pa crea sosten popular pa conservacion di tribon y raya entre comunidad local, como tambe aumenta conocemento tocante especienan di tribon y raya dentro di e region, door di conduci un cantidad di proyecto di investigacion.

Un estudio recien publica di Investigacion Marino Wageningen como parti di e proyecto a establece un ‘baseline’ pa diversidad actual, distribucion, abundancia, comportamento di espacio y structura di poblacion di tribon pa rifnan rond di e islanan.

A usa dos metodo pa studia tribon. Un a usa Baited Remote Underwater Video (BRUV) cual a usa un aparato consistiendo di dos camara poni dilanti di un saco di has. E idea ta cu ora tribon ta bin cerca di e saco pa come, por colecta imagen di video pa identifica y conta poblacion di tribon. E otro metodo tabata ‘acoustic telemetry’ pa track tribon. Den e metodo aki, un aparato acustico di tracking ta implanta den e tribon. Ta instala receiver acustico na sitionan specifico, y na cualkier momento cu e tribonnan cu e transmisornan aki ta bay cerca di e receiver (den un rango entre 450 y 850m) ta graba nan.

A conduci e prome estudionan usando BRUV na Saba, Saba Bank y St. Eustatius pa compronde e poblacion local di tribon y raya miho, y nan abundancia relativo, y esaki tabata funda pa gobierno Hulandes. Cuminsando na 2015, como parti di proyecto SOS, a conduci estudionan adicional pa inclui e awanan rond di Bonaire, Corsou y St. Maarten. Na 2017, a haci un estudio BRUV na Aruba, financia pa Global Finprint.

Ademas, como parti di proyecto SOS, a usa acoustic telemetry tambe pa compronde miho e movemento di tribon, uso di habitat, migracion y conectividad entre e islanan. E estudio di telemetry a track dos especie di tribon, e Caribbean reef shark (Carcharhinus perezi) y e nurse shark (Ginglymostoma cirratum) rond di Saba (for di 2014) y despues rond di Saba Bank, St. Maarten y St. Eustatius (for di 2015).

Den BRUV lansa rond St. Maarten, Corsou y Bonaire, e especie mas comun di tribon detecta tabata Caribbean reef shark, cu St. Maarten tambe frecuentemente mustrando nurse shark. En general, a observa mas tribon den parkenan marino of areanan di conservacion cu den areanan no protegi. Ademas, ora a compara a BRUV di St. Maarten, Corsou y Bonaire cu estudionan BRUV anterior di Aruba, Saba, St. Eustatius y Saba Bank, a mustra cu Aruba tabatin e diversidad mas grandi di tribon (ocho especie) y Bonaire esun mas chikito (dos especie). Tabatin test submarino BRUV na 300m di profundidad fuera di Corsou, cual a haya un especie adicional di tribon (Cuban dogfish). Den total a mira dies especie di tribon den Hulanda Caribense den e varios estudio BRUV.

E estudionan di acoustic telemetry a demostra cu tanto e Caribbean reef shark como e nurse shark tin areanan chikito pa biba, y ta fiel na un sitio. Crusadanan grandi entre areanan tabata inusual, y a haya pa dos Caribbean reef shark y un nurse shark, cu a biaha entre Saba y Saba Bank. E dos Caribbean reef shark a haci biahenan cortico dirigi bay y bin back, mientras e nurse shark, despues di ausencia di dos aña, a aparece den Saba Bank prome cu bay back Saba. Un nurse shark di otro estudio riba US Virgin Islands a ser detecta den e red di Saba Bank, un distancia di al menos 160km.

Importancia di areanan protegi
Tanto e estudio BRUV como acoustic telemetry a mustra mayor presencia di tribon asocia cu rif den zonanan di conservacion, hunto cu fidelidad halto na un sitio y areanan chikito di habitat. Ademas algun movemento riba distancianan mas largo tambe a ser documenta, apenas ta cuminsa compronde e interconectividad entre e areanan aki. E estudio andando riba acoustic telemetry (funda ma Ministerio di Agricultura, Naturalesa y Calidad di Cuminda (LNV)) lo duna mas datonan riba esaki. Pues, no solamente parkenan marino ta crucial pa conservacion di tribon y raya, sino rednan grandi di conservacion, manera e Yarari Marine Mammal and Shark Sanctuary, cu ta inclui tur awa di Bonaire, Saba y Sint Eustatius, ta vital pa protege poblacionnan completo.