Varios homber cu arma di candela a ataca un bar di e ciudad di Coatzacoalcos, na Mexico y nan a provoca un candela grandi cu a laga por lo enos 25 morto y 11 herido di gravedad, un hecho cu lo por ta relaciono cu pelea entre gruponan di crimen organisa, autoridadnan a informa ayera.
Presidente Andres Manuel Lopez Obrador a condena e atake ‘inhumano’ y a agrega cu autoridadnan federal lo investiga e posibel conspiracion entre e fiscalia di Veracruz, bou di cual Coatzacoalcos ta cay, y e crimen organisa.
E agresornan a drenta na e bar ‘Caballo Blanco’ y a cuminsa tira contra e clientenan, pa despues provoca un candela. Nan a lansa bomba molotov, segun algun testigo a bisa. Otro ta bisa cu nan a basha gasolin pa despues inicia e candela.
Gobernador di Veracruz, Cuitláhuac García a bisa riba Twitter cu ta sospecha cu un di e autornan material di e masacre, a ser deteni caba na juli pasa y a ser libera oranan despues pa e fiscalia local.
Lopez Obrador a confirma e informacion cu algun di e posibel responsabelnan a ser deteni y laga den libertad despues; tambe a bisa cu su gobierno lo investiga profundamente tanto e atake, como e supuesto conexion entre e fiscalia estatal y gruponan criminal.
Mexico a ser golpia pa un ola di violencia desde cu a declara e guera contra droga y a desplega ehercito pa lucha contra nan poderoso cartel na 2006. For di e momento ey, mas di 250.000 persona a ser asesina, cu un record di 33.753 aña pasa.
