(AP) — Un masa di hende den su mayoria jong entre decenas di miles cu a reuni pa celebra Halloween na Seoul a keda atrapa y trapa mientras e multitud a pusha den un gang estrecho, matando al menos 151 persona y heridando otro 82 den e pio desaster den añas na Sur Korea.
Trahadornan di emergencia y peatonnan desesperadamente a haci CPR riba hende drumi riba caya despues di e trapamento den e districto Itaewon conoci pa bida nocturno den e capital, diasabra anochi.
Esnan cu a fayece of a keda herida tabata mayoria adolescente y den nan 20 añanan di edad, segun Choi Seong-beom, hefe di departamento di bombero Yongsan di Seoul. E fayecidonan ta inclui 19 stranhero, el a bisa, sin revela nan nacionalidad. E cantidad di morto ainda por aumenta ya cu 19 di e heridonan tabata den condicion critico.
Ta calcula cu 100mil persona a reuni na Itaewon pa e festividad di Halloween di mas grandi di e pais desde comienso di e pandemia. Gobierno Sur Koreano a suavisa restriccionnan di Covid-19 den ultimo lunanan y esaki tabata e prome chens pa sali celebra pa hopi hoben.
Maske Halloween no ta un dia festivo tradicional di Sur Korea, unda masha tiki mucha ta bay ‘trick-or-treat’, e anochi ta keda un atraccion mayor pa adultonan hoben, y fiesta di disfraz na bar y club a bira hopi popular den añanan recien.
Testigonan a bisa cu e cayanan na Itaewon tabata asina yen di hende y vehiculonan moviendo slow cu tabata practicamente imposible pa trahadornan di emergencia y ambulance yega na e gang na tempo pa atende cu e heridonan.
Presidente Sur Koreano, Yoon Suk Yeol a declara un periodo di duelo nacional ayera y durante un discurso a bisa cu duna sosten na famia di e victimanan, incluyendo preparacion pa entiero y tratamento di e heridonan ta un prioridad pa su gobierno.
Esaki tabata e desaster di trapamento mas mortal den historia di Sur Korea. Na 2005, 11 persona a fayece y alrededor di 60 otro a resulta herido na un concierto di pop den ciudad di Sangju. Na 1960, 31 persona a fayece despues di a keda trapa riba e trapi di un stacion di trein mientras multitudnan grandi a core subi un trein durante festividad di Aña Nobo Lunar.
