Den algun dia BAVP 6% lo marca un diferencia na Aruba su comunidad. Hopi ta keha pero mucho no kier duna comentario pa motibo di miedo di perde trabou of puesto. Den e comentarionan duna pa residente y turista por nota cu di banda di residente tin hopi preocupacion, mientras turista ta mas custuma cu ‘Aruba ta caro’.
Bon Dia Aruba a comunica cu diferente departamento, instancianan y luganan di benta cu no kier a duna ningun comentario di asunto pa motibo cu sea mester a papia conhunto cu nan team di economista of a bisa cu no por bisa nada te ora wordo comunica den un conferencia di prensa.
Control di prijs
Na un minimarket na Meiveld un señora Colombia cu nacionalidad Hulandes a bisa cu e ta haya tin cu bay pone mas atencion na mini market. E señora a remarca cu ‘preferibel nan pone atencion na prijsnan di minimarket pasobra si na e minimarket e prijs ta subi pa 10 Afl, nan mes ta haci esaki 15 Afl. sin pensa cu nos tambe ta den situacion dificil, no ta nan so’.
Pa aclaria esaki: pa comerciantenan no pone un 6% adicional na e totalidad cu e consumido tin cu paga riba dje. Segun minister Xiomara Ruiz-Maduro (MEP), e tarea di control ta cay bou Departamento di Impuesto. Minister Ruiz-Maduro tambe a remarca den conferencia di prensa cu e ta keda na consumido pa ta alerta y consciente ora e ripara cu aumento di prijs ta mucho halto riba benta asina evita bay camindanan cu ‘ta tuma hende haci’.
Pa esunnan cu tin menos entrada
Manera prome minister Evelyn Wever-Croes (MEP) a anuncia,e medida aki ta un decision dificil. “Probablemente pa cualkier politico ta un decisionnan mas dificil cu e tin cu tuma. Pero nos a compromete nos mes pa soluciona e problema financiero di nos pais.”
Bon Dia Aruba a logra papia cu diferente hende cu no kier a duna nan number pa motibo di miedo. Un señora mes naci na Haiti cu dos trabou a comenta tocante e situacion dificil cu ta reina caba pa por mantene su famia.
‘Mi tin dos trabou anto un mi ta caba te casi 2or di madruga pa por paga cas y por cuida mi yiu’, el a remarca. Pa via di miedo e ta prefera di no duna number paso e ta sinti cu su doño di trabou lo por hala su atencion. “Ta dificil si tur cos bay subi, mester warda wak kico ta bay pasa.” E situacion ta uno dificil paso no ta solamente producto ta bay subi pero tur cos tambe, el a bisa. Pa loke ta trata e cambio cu lo introduci prome di juli, siman venidero lo nota aumento den prijs sea di producto di supermercado of cualkier cos cu mester paga.
Cambio pa turista
Un señora turista, Marisol, a duna un palabra na Bon Dia Aruba pafo di un supermercado bisando cu ‘e isla aki ta manera mi di dos cas, mi ta bin aki pa gasta pa duna mi gusto’. Sra. Marisol ta un turista cu ta bin casi tur aña Aruba. E ta aclaria cu nan semper a considera Aruba un Isla costoso unda esunnan cu ta bin pa vacacion sa cu mester gasta nan placa. “Tin comerciantenan cu tin negoshi afo y tin e luho di come na luga caro of haci compras grandi, haci yen actividad, claro tin esunnan cu ta bin cu menos placa anto nan tin un presupuesto den kico nan por gasta. Pues un poco mas consciente.”
Sra. Marisol ta splica cu manera un turista e no por papia pa tur hende, pero den su mesun experiencia e no ta sinti e lo afecta e turismo hopi paso manera e di nan ta bin pa gasta, claro e semper ta tende comentario rond unda turista ta bisa ‘esta isla es cara’, el a finalisa ta bisa.
